आज रातीदेखि भारी बर्षाको सम्भावना

२४ साउन, काठमाडौं । पानी पार्ने न्युन चापीय रेखा नेपाल नजिक आएपछि आज रातीदेखि देशका विभिन्न ठाउँमा भारी बर्षाको सम्भावना रहेको मौसमविदले बताएका छन् । शनिबार रातिबाट मनसुन न्यून चापीय रेखा नेपालको तराई भू–भाग नजिक आउने सम्भावना देखिएकाले दुई–तीन दिनसम्म देशका धेरैजसो ठाउँमा भारी बर्षा हुने जल तथा मौसम विज्ञान विभागको मौसम पूर्वानुमान महाशाखाले जनाएको छ ।

कम्तीमा तीन दिनसम्म भारी बर्षाको सम्भावना रहेकाले सतर्क हुन मौसमविदले आग्रह समेत गरेका छन् । हाल मनसुन न्युन चापीय रेखा नेपालभन्दा दक्षिणतर्फ छ । न्युन चापीय रेखा जहाँ पर्छ त्यहाँ वर्षा हुन्छ ।

मनसुनी रेखा नेपालमाथि आइपुगेमा देशभर मनसुनी प्रभाव पर्ने मौसमविद शान्ति कडँेलले जानकारी दिइन् । शनिबार बिहान प्रदेश नं. २ मा र प्रदेश नं. ५ का केही भू–भागहरुमा आंशिक बदली छ भने बाँकी भागहरुमा समान्यदेखि पूर्ण बदलीको अवस्था छ ।

बागमती प्रदेश, गण्डकी प्रदेश, प्रदेश नं। ५, कर्णाली प्रदेश र सुदूरपश्चिम प्रदेशका केही स्थानहरूमा वर्षा भइरहेको मौसम पूर्वानुमान महाशाखाले जनाएको छ । यसबेला नदीमा बाढी आउने र केही ठाउँमा डुबान हुने सम्भावना पनि छ ।