गासँ बाँसको समस्यामा बारेकोटका पहिरोपीडित

२४ साउन, जाजरकोट । पहिरोबाट विस्थापित भएर कैयौ रात त्रिपालमा काटेका जाजरकोटका पहिरोपीडितलाई गास बाँसको समस्या परेको छ । महिनौ बितिसक्दा पनि बाढी पिडितहरुले उचित गाँस बाँस पाउन सकेका छैनन् ।

गएको असारमा गएको पहिरोले बारेकोट गाउँपालिका–१, ४, ५, ६, ७ का बाढीपीडितहरु स्थानीय विद्यालय नजिकैको जंगलमा त्रिपाल बनाएर बसिरहेका छन् । असार २५ गते सार्कीटोलमा गएको पहिरोबाट विस्थापित भएका उनीहरु अहिले ठूलो समस्यासँग जुधिरहेका छन् । तर उनीहरुलाई अहिलेसम्म राहतका नाममा गतिलो खाने बस्ने व्यवस्था भने छैन् ।

कार्यकर्तालाई राहत, पीडितलाई बेवास्ता

जाजरकोटका बाढी पहिरो पीडित साँझ बिहान के खाने, के लाउने भनेर छट्पटाएका छन् । तर जनप्रतिनिधि र नेताहरु भने आफ्नै पार्टीका कार्यकर्तालाई मात्रै राहत बाड्न व्यस्त भएका छन् । बाढी पिडितहरुको घरमा छाक टार्न गाह्रो भएको बेलामा पार्टींका कार्यकर्ता हुनेखानेलाई मात्रै राहत वितवरण गरिएको स्थानिय राईबहादुर तिरुवा बताउँछन ।

सार्कीटोलमा पहिरोले १२ जनाको मृत्यु भएको थियो भने सयौ घरपरिवार विस्थापित भएका थिए । पहिरो लगत्तै केन्द्र सरकारदेखि प्रदेश सरकारले आकाशमा हेलिकोप्टर घुमाएपनि गरीब पीडितलाई भने गतिलो सँग कसैले व्यवस्थापन गर्न सकेन ।

यस्तै खानेपानीको समेत गतिलो व्यवस्थापन नहुँदा समस्या भएको उनीहरुको गुनासो छ । जंगलमा बस्दा जंगली जनावरको साथै सर्प जस्ता विषालु प्राणीको पनि उत्तिकै डर छ । बारेकोट गाउँपालिका अध्यक्ष महेन्द्रबहादुर शाहले पहिरोपीडित सबैको उद्धार गरिएको र राहतको व्यवस्थापन भइरहेको बताउँछन् ।

पहिरो पीडितको व्यवस्थापन र राहतका विषयमा प्रदेश र केन्द्र सरकारसँग पहल भइरहेको पनि उनको भनाई छ । तर उनले पार्टी कार्यकर्तालाई राहत वितरण गरिएको विषयमा भने खुलेर प्रतिक्रिया दिन चाहेनन् ।

लोकेन्द्र विश्वकर्माबाट