नेकपा फुटको संघारमा: सांसद तथा केन्दीय सदस्यहरुलाई राजधानी बोलाइयाे

२४ साउन, काठमाडौं । नेकपाभित्रको शक्तिसंघर्ष अन्नत फुटको संघारमा पुगेको छ । प्रधानमन्त्री तथा नेकपाका पहिलो अध्यक्ष केपी ओलीले पछिल्लो समय प्रयोग गरेको बामदेव अस्त्र झनै भुत्ते सावित भएपछि नेकपाका नेताहरु अब सँगै अगाडि बढ्न नसकिने निश्कर्षमा पुगेका छन् ।

एकसातादेखि प्रधानमन्त्री ओली र अर्का अध्यक्ष पुष्पकमल दाहाल ‘प्रचण्ड’बीचको वार्ताको वातावरण नै नबनेपछि दुवै समुह एकअर्कालाई खुईल्याउने चरणमा प्रवेश गरेका छन् । ओलीले आफ्ना प्रमुख राजनीतिक सल्लाहकार बिष्णु रिमाल र प्रेस सल्लाहकार सूर्य थापामार्फत प्रचण्ड र माधव समुहलाई खुईल्याउने र प्रचण्ड–माधवले आफू निकट पत्रकारहरु बोलाएर सरकार र ओलीको तेजोबध गर्न थालेपछि दुर्व समुह आआफ्नो वर्चश्व कायम गर्नेतर्फ अग्रसर भएको नेकपा उच्च स्रोतको भनाई छ । पार्टी विभाजित गराउने खेलोफड्कोमा अन्तर्राष्ट्रिय शक्तिकेन्द्रहरु पनि सल्बलाउन थालेका छन् ।

कोरोना संक्रमण बढ्दै गएको बेला पार्टी फुटको संघारमा पुगेपछि बिहीबार विभिन्न प्रदेशका मुख्यमन्त्रीहरू रातरात काठमाडौं आएका छन् । त्यसैगरि संघीय संसदका सांसदहरूलाई पनि केही दिनदेखि राजधानीमै केन्द्रित रहन दुर्व पक्षबाट आदेश दिइएको छ । बालुवाटार र खुमलटार दुबैले सांसद र केन्द्रीय सदस्यहरुलाई आफुतर्फ तान्ने प्रयत्न थालिएको छ ।

सचिवालय बाहेक पार्टीका कुनै पनि तहका बैठक बोलाउन ओली तयार नभएपछि दुवै पक्ष आआफ्नो समुह संख्यात्मक रुपमा बलियो पार्ने अभियानमा लागेको हो । प्रचण्ड–माधव समुहले संसदको विशेष अधिवेशन बोलाउने तयारी स्वरुप हस्ताक्षर अभियान चलाएको छ । राजधानी बाहिर भएका सांसद र केन्द्रीय सदस्यहरुलाई पनि यतिबेला काठमाडौं बोलाइएको समाचार स्रोतको दावी छ ।