टीकापुरमा ‘ग्याङफाइट’ : ५ युवा घाइते

२५ साउन, टीकापुर । कैलालीको टीकापुरमा दुई समूहबीच झडप (ग्याङफाइट) भएको छ । झडपमा परी पाँच जना घाइते भएका छन् । तीन जनाको अवस्था गम्भिर छ । टीकापुर नगरपालिका वडा नं ६ र वडा नं ९ का युवाबीच शनिबार साँझ झडप हुँदा वडा नं ६ प्रसेनीका दिनेश साउद, किरण रावल र सुरज चौधरी र वडा नं ९ बैदीका तपेन्द्र साउद र भुवन साउद घाइते भएको इलाका प्रहरी कार्यालय टीकापुरले जनाएको छ ।

घाइतेमध्ये दिनेश साउद, भुवन साउद र सुरज चौधरीको अवस्था गम्भीर छ । उनीहरुलाई थप उपचारका लागि टीकापुर अस्पतालबाट नेपालगञ्ज सिफारिस गरिएको प्रहरी कार्यालयका प्रमुख प्रहरी निरीक्षक मधुसुधन न्यौपानेले जानकारी दिए ।

बाँकी दुई जनाको टीकापुर अस्पतालमा उपचार भइरहेको छ । प्रहरीका अनुसार टीकापुरको खक्रौलास्थित बालुवाटारमा भएको झडपमा दुई समूहले एक–अर्कालाई धारिलो हतियार प्रहार गरेका थिए ।

घटनास्थलबाट प्रहरीले टीकापुर प्रसेनीका रवन साउद र लोकेन्द्र कडायतलाई नियन्त्रणमा लिएको छ ।