सुत्केरी हुन नसकेकी गर्भवतीको उद्धार

२५ साउन, बागलुङ । बागलुङको बडिगाड गाउँपालिका–७ मा एक गर्भवती महिलाको उद्धार गरिएको छ । १७ वर्षीया गर्भवती सुत्केरी हुन नसकेपछि हेलिकोप्टरमार्फत उद्धार गरिएको हो ।

सुत्केरी व्यथा लागेर सो स्थानकी लक्ष्मी गुरुङलाई सुरूमा भिमगिठे स्वास्थ्यचौकी लगिएको थियो। नवजात शिशु जन्मनुभन्दा पहिले नै साल खसेर शिशुको हात बाहिर निस्केका कारण सो स्वास्थ्यचौकीले सुत्केरी गराउन सम्भव नभएपछि प्राथमिक स्वास्थ्य केन्द्र बुर्तिवाङलाई रिफर गरेको थियो।

बुर्तिवाङमा पनि सुत्केरी हुन नसकेपछि उनीलाई गण्डकी अस्पताल पोखरा रिफर गरिएको बडिगाड गाउँपालिकाका स्वास्थ्य शाखाका चूणामणि कँडेलले जानकारी दिए। गुरुङलाई गण्डकी प्रदेश सामाजिक विकास मन्त्रालयबाट उद्धार गरिएको हो।