नेकपा नगर कमिटी सचिव कोइरालालाई बलात्कार आरोप

प्रकाश डोटेल

२६ साउन, स्याङ्जा । स्याङ्जाको चापाकोट नगरपालिकाका नेकपा नगर कमिटी सचिव राजु कोईरालालाई बलात्कार आरोप लागेको छ । चापाकोट नगरपालिका १० बोटेटारकी एक दलित महिलालाई बलात्कार गरेको कोइरालालाई आरोप लागेको हो ।

बैदेशिक रोजगारबाट घर फर्किएका श्रीमान क्वारेन्टाइनमा रहेका समयमा कोईरालाले अन्दाजी ३५ वर्षकी दलित महिलालाई बलात्कार गरेको आरोप लागेको छ । बलात्कारमा परेकी महिललाई ५ लाख दिएर कोइरालाले घटनालाई लुकाएको समेत स्थानीयले आरोप लगाएका छन् ।

कोइरालालाई बलात्कार आरोप लागेपछि चापाकोट नेकपा नगर कमिटिले आरोपलाई खण्डन गरेको छ । आरोपित कोइरालालाई बचाउन नगर कमिटिले विज्ञप्ति जारी गर्दै घटनाको खण्डन मात्रै नगरी युवाहरु परिचलान गरेर ¥याली समेत प्रदर्शन गरेको स्थानीयले बताएका छन् ।

आरोपित कोइरालाले आफूले कुनै महिलालाई बलात्कार नगरेको दाबी गरे । उनले भने, “मैले कोही कसैलाई अनैतिक व्यवहार गरेको छैन्, तर अनाहकमा आरोपित हुनु परेको छ ।” आफ्नो राजनीतिक हैसियतलाई सिध्याउनका लागि विरोधीले बलात्कारको आरोप लगाएको उनले बताए ।

बलात्कृत महिलाका श्रीमान क्वारेन्टाइनमा रहेको मौकामा कोइरालाले महिलाको घरमा गएर बलात्कार गरेको र महिलाका ससुराले कोठाको ढोकामा बाहिरबाट ताल्चा लगाएपछि घटना बाहिर आएको स्थानीयले बताए । स्थानीयका अनुसार घटनालाई नचर्काउन आग्रह गर्दै कोइरालाले दलित परिवारलाई ५ लाख नगदसमेत दिएका थिए ।

घटनालाई अतिरञ्जित गरेको भन्दै चापोकाट नगरपालिका ४ का विश्वास पुरी र प्रतिककमार गैह्रलाई चापाकोट नेकपा नगर कमिटीले कारबाहीको माग गरेको छ । बलात्कार आरोप लागेका कोइरालालाई नियन्त्रणमा लिएर अनुसन्धान गर्नुको सट्टा उल्टै निर्दोष नागरिकलाई कारबाही गर्न माग गरेपछि स्थानीयले घटनाको निष्पक्ष छानबिन गर्न माग गरेका हुन् ।

आरोपी कोइरालाको विगत विवादास्पद छ । उनलाई स्थानीय युवाहरु परिचालन गरे काठ तस्करी गरेको आरोप पनि लागेको छ । उनले स्थानीय फर्निचर व्यवसायीलाई आर्थिक लगानी र परिचालन गरेर काठ तस्करी गरेको समेत स्थानीयले आरोप लगाएका छन् । स्थानीयले अरोपी कोइरालालाई नियन्त्रणमा लिएर कारबाही गर्न माग गरेका छन् । आरोप लागेपछि अनुन्धान गर्नुपर्ने निकायले मौनता साधेर आरोपितलाई उन्मुक्ति दिन खोजेको भन्दै स्थानीय सहज रुपमा कारबाही नगरे कोइराला र स्थानीय प्रशासन बिरुद्ध आन्दोलन थाल्ने समेत चेतावनी दिएका छन् ।