कपिलवस्तुमा भोलिदेखि निषेधाज्ञा !

२६ साउन, कपिलवस्तु । कोरोना भाइरसको संक्रमण बढ्दै गएपछि जिल्ला प्रशासन कार्यालय कपिलवस्तुले निषेधाज्ञा जारी गरेको छ । भोलि विहान ५ बजेदेखि लागु हुने गरी निषेधाज्ञा लागु गरिएको प्रशासनले जारी गरेको विज्ञप्तीमा उल्लेख छ ।

कोरोनाको संक्रमण रोकथाम तथा नियन्त्रणाका लागि भन्दै साउन ३२ गते राति १२ बजेसम्मका लागि निषेधाज्ञा जारी गरिएको प्रमुख जिल्ला अधिकारी दीर्घनारायण पौडेलले बताए । प्रदेश ५ मै सबैभन्दा धेरै कपिलवस्तुमा संक्रमित भेटिएपछि निषेधाज्ञा जारी गरिएको हो । कपिलवस्तुमा आइतबारसम्म ८ सय ५७ जना कोरोना संक्रमित रहेका छन् ।

जिल्लास्तरीय कोरोना संकट व्यवस्थापन समिति डीसीसीएमसीको सोमबार बसेको बैठकले अत्यावश्यकीयबाहेक अरु सबै खाले व्यवसाय सञ्चालन गर्न नपाइने निर्णय गरेको छ । खाद्यान्न तथा तरकारी किनमेलका लागि दैनिक बिहान ८ बजेदेखि १० बजेसम्मको समय छुट्याइएको छ ।