फेसबुकमा अश्लिल फोटो हालेपछि हत्या गरेर सुटकेशमा शव !

२७ साउन, काठमाडौं । सामाजिक सञ्जाल फेसबुकमा अश्लील फोटो हालेको रिसमा महिलाले कतिसम्म क्रुर अपराध गर्छन् भन्ने नयाँ दृष्टान्त गोंगबु हत्या प्रकरणले देखाएको छ । आफ्नो फोटो सामाजिक सञ्जाल फेसबुकमा हाल्ने, अरुसँग फोहोर कुरा गरेर आफ्नो चरित्र हत्या गर्न थालेपछिको परिणाम, सुटकेशमा टाउको विनाको शव भेटिएको गोंगबु हत्या प्रकरण भएकाे प्रारम्भिक बयानमा खुलेकाे छ ।

पछिल्लो समय महिला मैत्री कानुन बनेपछि आम महिलाहरु कतिसम्म क्रुर हुन सक्छन् भन्ने दृष्टान्त यस घटनाले देखाएको छ । एउटा पुरुषले सामान्य घटना घटाउँदा अराजक रुपमा उफ्रिने महिला अधिकारकर्मीहरु महिलाका यस्ता जघन्य अपराधमा भने चुपचाप रहने गरेका छन् । गणतन्त्र र कथित महिला अधिकारका नाममा पछिल्लो समय घटेका यस्ता क्रुरतापूर्ण अपराधले समग्र महिलाहरुको पनि शिर लाजले निहुरेको हुनुपर्छ ।

कल्पना नामकी ती अपराधिक मानसिकताकी महिलाले आफ्नै हातले एक पुरुषको हत्या मात्रै गरेकी छैनन् । अण्डकोषमा हानेर हत्या गरेपछि टाउको र खुट्टा काटेर शरीरलाई सुटकेशमा हालेर सडक छेउमा फालेकी छिन् । नेपालमा एक महिलाले यस किसिमको हत्या गरेकाे घटना प्रहरीका लागि पनि नौलो थियो । यौन विवादमा जोडिएको भनिएकाे यो हत्या प्रकरणले नेपाली समाजकै मथिंगल हल्लाई दिएको छ ।

गोगंबु हत्या प्रकरणको नालीबेली

गोंगबुमा पुरुषको हत्या गर्ने महिला हुन् कल्पना मुडभरी पौडेल । उनको पेशा स्पष्ट छैन् । माइती पूर्वी चितवन भएको खुलेको छ । उनी केही समयअघिसम्म मोडलिङ तथा अभियन क्षेत्रमा क्रियाशील रहेको पाइएको छ । गोंगबुमा टाउको विनाको शव भेटिएको घटना घटाउनुअघि उनले मृत्तक कृष्णबहादुर बोहरालाई स्लिपिङ ट्यावलेट खुवाइ लठ्याएपछि हम्मरले अण्डकोषमा हानेकी थिइन् ।

महानगरीय प्रहरी परिसर र महानगरीय अपराध नियन्त्रण महाशाखाले गरेको प्रारम्भिक अनुसन्धानमा पौडेल एक्कैलै ती पुरुषको हत्या गरेकी हुन् । शव व्यवस्थापनमा भने उनले आफ्नै छोरीलाई साथसमेत लिएको खुलेको महाशाखाका प्रमुख प्रहरी वरिष्ठ उपरीक्षक दीपक थापाले जानकारी दिए ।

जोजो नामको कुकुरको सहयोगमा अनुसन्धान गरिएकाले प्रहरीले उक्त घटनाको अनुसन्धानलाई ‘जोजो अपरेशन’को नाम दिएको छ । घटना यही साउन २४ गते रातिको हो । साउन २५ गते बिहान ०७ बजे काठमाडौँको टोखा नगरपालिका–१० गोङ्गबुस्थित नवज्योती मार्गमा कालो रङकाे सुटकेशभित्र रगत जस्तो पदार्थ बगिरहेको भन्ने जानकारी प्राप्त भएपछि परिसर र महाशाखाबाट अनुुसन्धानका लागि टोली खटिएको थियो । उक्त सुटकेश खोलेर हेर्दा भित्र टाउको र खुट्टा नभएको अवस्थामा शव फेला परेको थियो ।

घटनाको अखनुसन्धानका क्रममा चितवनको कालिका नगरपालिका–७ घर भई हाल टोखाको सोही क्षेत्रमा बस्ने ३७ वर्षीय कल्पना मुडभरी पौडेलले घटना घटाएको रहस्य खुलेको हो । प्रहरीले साउन २६ गते नै उनलाई चितवन प्रहरीको सहयोगमा माइतीमा रहेको बेला कालिका नगरपालिका–९ शक्तिखोरबाट पक्राउ गरेको थियो ।

उनी यसअघि अभिनयसमेतमा संलगन थिइन् तर अहिले गृहिणीका रुपमा रहेको बताइएको छ । विगत केही वर्षदेखि श्रीमानकाे सम्पर्कबाट बाहिर रहेकी उनी छोरा र छोरीको साथमा काठमाडौँ बस्दै आएकी थिइन् ।

यसरी भएको थियो विभत्स हत्या !

साउन २५ गते विहान रातो प्लाष्टिकले बेरेको नाम्लोसहितको कालो रङकाे सुटकेसभित्र टाउको र खुट्टा नभएको शव फेला पर्यो । तत्काल जोजो नामको तालिमप्राप्त कुकुर परिचालन गरी घटनाको अनुसन्धानमा प्रहरी लाग्यो । तत्कालै कुकुरले सुटकेश भेटिएको अन्दाजी ३०० मिटर पूर्वउत्तरस्थित स्वर्गद्वारी मार्गको खाली जमिन छेउमा टाउको र खुट्टा पोको पारेर फालेको अवस्थामा फेला परेको थियो ।

मृतकको पहिचान नखुलेपछि प्रहरीले पहिचानका लागि तस्वीर सार्वजनिक ग¥यो । साउन २६ गते नै बोहाेराका मामा पर्नेले उनको सनाखत गरेको महानगरीय प्रहरी परिसरका प्रमुख प्रहरी वरिष्ठ उपरीक्षक श्यामलाल ज्ञवाली बताउँछन् ।

उनको घर रोल्पाको रुन्तीगढी गाउँपालिका–७ हो । हाल गोङ्गबुस्थित एक होटलमा बस्दै आएका थिए । उनी गार्मेन्टको सामान थोक बिक्री वितरणमा संलग्न थिए । प्रहरीको अनुसन्धानमा उनी विगत आठ महिनादेखि उक्त होटलमा बस्दै आएको खुलेको छ ।

उनीहरु बीच तीन/चार वर्षदेखिको फेसबुकमार्फत चिनाजान रहेको पत्ता लागेको छ । प्रारम्भिक अनुसन्धानका क्रममा मृतक बोहाेराले अभियुक्तको फोटो राखी नक्कली फेसबुक आइडी बनाएर चलाउने गरेको र महिलालाई आफु अनुकूल हिंड्नका लागि दवाव दिने गरेको खुल्न आएको एसएसपी थापाले बताए ।

उनका अनुसार छोरीलाई समेत उनले आँखा लगाउने गरेका थिए । तर, हत्यामा त्यति मात्रै कारण भन्नेमा प्रहरी ढुक्क छैन । पुरूषसँग ती महिलाले ५० लाख मागेकाे वा सापटी लिएकाे भन्ने चर्चा चलेकाे छ । अन्य कुरा अनुसन्धानपछि मात्रै खुल्ने जनाइएको छ ।

दहीमा मिसाएर स्लीपीङ ट्याब्लेट खुवाएपछि अण्डकोषमा हम्मर प्रहार !

घटनास्थलको दिनमा त्यही होटलमा बा ७२ प ५६४४ नम्बरको स्कुटरसमेत फेला परेपछि प्रहरीलाई तथ्य खोज्न सहज भएको थियो । घटना भएको दिन राति महिलाले आफ्नै कोठामा बोलाएर मदिरासहित दही, चिउरा मासुसमेत खान दिएको खुल्न आएको छ ।

दहीमा पाँच वटा निद्रा लाग्ने औषधी मिसाएर खुवाएकी थिइन् । त्यसपछि बोहरा लठ्ठिएर सुतेपछि फलामको हम्मरले अण्डकोषमा हानेर मारेको अनुसन्धानमा खुलेको प्रहरीले जनाएको छ ।

त्यसपछि सलले बाँधी धारिलो हतियार प्रयोग गरी टाउको र खुट्टा छिनाइ झोलामा राखेर आफैँले फ्याँकेको महिलाले बयान दिएकी छिन् । उनले घटना स्वीकार गरेको र अन्य पाटो भने अनुसन्धानको क्रममा रहेको एसएसपी थापाले बताए ।

निर्दोष छोराछोरीमाथिको अभियोग

शव व्यवस्थापनमा कठिनाई भएपछि छोरीसमेतलाई संलग्न गरेकी थिइन् । पानी परेकाले छोरीलाई छाता ओढाउन लगाए उनले सुटकेस बोकेर उनी त्यहाँ सुटकेस फ्याँकेर फर्किएकी थिइन् ।

भोलिपल्ट चिनजानको एम्बुलेन्समार्फत उनी चितवन फर्किएको खुल्न आएको छ । त्यो एम्बुलेन्स आफ्नो नातेदारले चलाउने गरेकाे रहेको बुझिएपनि यकिन भइनसकेको प्रहरीले जनाएको छ । घटना सबै घरभित्र घटाएर एक्लै शव व्यवस्थापन गर्न नसक्दा छोरीको सहयोग लिनुपरेको उनले बयान दिएकी छिन् ।

प्रहरीले घटनामा प्रयोग भएको धारिलो हतियार, ह्याम्बर, रगत लतपतिएको पञ्जा म्याट्रेस, मृतकका कपडा, स्लिपिङ ट्यावलेटका खोल, मोबाइल सेट बरामद गरेको छ ।

आज घटनाबारे पत्रकार सम्मेलन गरी सार्वजनिक गर्दै प्रहरीले कर्तव्यज्यान मुद्दामा अनुसन्धान थालेको जनाएको छ । पैसाको लेनदेनको विषयमा भने अनुसन्धान भइरहेको प्रहरीले जनाएको छ ।