रुपन्देहीको कोरोना अस्पतालमा दुई जनाको मृत्यु

२८ साउन, बुटवल । रुपन्देहीको बुटवलको कोरोना विशेष अस्थायी अस्पतालमा दुई जनाको मृत्यु भएको छ । उपचारका लागि आइसोलेसनमा भर्ना भएका कपिलवस्तुको कपिलवस्तु नगरपालिका वडा नंं। २ तौलिहवाका ४२ वर्षीय कृष्णकुमार गुप्ता र कपिलवस्तुको कृष्णनगरका २५ वर्षीय प्रदीप तेलीको गएराति मृत्यु भएको अस्पतालले जनाएको छ ।

मृत्तकमध्ये एक जना संक्रमित हुन भने अर्काको कोरोना परीक्षण बाँकी छ । उनीहरु दुई दिनको फरकमा अस्पताल भर्ना भएका थिए । अस्पताल भर्ना भएपछि उनीहरुलाई भेन्टिलेटरमा राखिएको थियो ।

बुटवल कोरोेना अस्पतालमा कोरोना संक्रमितको मृत्यु भएको यो पहिलो घटना हो । यसअघि अस्पतालमा सैनामैनाका बाबुराम थापाको मृत्यु भएको थियो । तर उनको रिपोर्ट कोरोना नेगेटिभ आएको थियो ।

पछिल्लो समय दैनिक कोरोना संक्रमितको मृत्यु भइरहेको छ । कोरोना जोखिम बढेको भन्दै सरकारले स्कुल खोल्न रोक लगाएको छ भने होटल, रेष्टुरेन्ट तथा हवाई उडान पनि बन्द छन् ।