पत्रकार बानियाँको मृत्युबारेमा अनुसन्धान गर्न तयार छौ : एसपी कार्की

२८ साउन, काठमाडौं । वरिष्ठ पत्रकार बलराम बानियाँको रहस्यमय मृत्युका बारेमा अनुसन्धान गर्न तयार रहेको महानगरीय अपराध महाशाखाले जनाएको छ । बानियाँको बल्खु नजिकै बागमति नदीमा खसेर मृत्यु भएको अवस्थामा मकवानपुरको सिस्नेरीमा शव भेटिएको थियो ।

सोमबारदेखि बेपत्ता बानियाँको प्रहरीसँगको भेट तथा उनी कार्यरत संस्था कान्तिपुर दैनिककै समाचारमा समेत स्पष्टता नभएको लगायत कारण बानियाँको मृत्युलाई रहस्यमय भनिएको छ । नेपाल पत्रकार महासंघले बुधबार प्रेस विज्ञप्ती निकालेर घटनाको छानबिन गर्न माग गरेको छ । महासंघका महासचिव रमेश बिष्टले विज्ञप्ती निकालेर उनको मृत्युको एकिन कारण थाहा नभएको भन्दै छानबिन गर्न माग गरेका हुन् ।

उनी बल्खुको तरकारी पसल नजिकैबाट चिप्लिएर खोलामा खसेको प्रत्यक्षदर्शीले बताएको जानकारी आफूहरुले पाएको अपराध महाशाखाका एसपी तथा प्रवक्ता ईश्वर कार्कीले जानकारी दिए । चिप्लिएर लडेका उनको शव मकवानपुरमा भेटिएको चौबिस घण्टापछि मात्रै पहिचान भएको हो ।

‘प्रत्यक्षदर्शीले नै चिप्लिएर लडेको देखेपछि ठूलो कारण देखिदैन’ अपराध महाशाखाका प्रवक्ता समेत रहेका एसपी कार्कीले नेपालबहससँग भने, ‘प्रहरीको कामै अनुसन्धान गरेर सत्यतथ्य पत्ता लगाउने भएकाले यस विषयमा पनि अनुसन्धान गर्न तयार छौ ।’

कान्तिपुर दैनिकमा पछिल्लो एक बर्षदेखि कार्यरत बानियाँ खोज पत्रकारितामा दखल राख्थे । बेला बेला समाचारकै कारण आलोचित हुने उनी आम नागरिकको चाँसोको विषयमा समाचार लेखनमा निर्भिक मानिन्थे । पत्रकार बानियाँको मृत्युले विक्षिप्त बनेका पत्रकारले सामाजिक सञ्जालमै श्रद्धाञ्जली दिनुका साथै घटनाको छानबिन गर्न माग समेत गरेका छन् ।

पत्रकार बानियाँको मृत्युबारे छानबिन गर्न माग गर्दै पत्रकार महासंघले जारी गरेको विज्ञप्ती :

मिति : २०७७/४/२८

शोक विज्ञप्ती

नेपाल पत्रकार महासंघका पूर्व केन्द्रीय सचिव बलराम बानियाँको दुखद निधनले नेपाल पत्रकार महासंघ स्तब्ध भएको छ । विगत तीन दशकदेखि नेपाली पत्रकारिता जगतमा महत्वपूर्ण योगदान पु¥याउनुभएका बानियाँ पछिल्लो समय कान्तिपुर राष्ट्रिय दैनिकको सहायक सम्पादकका रुपमा कार्यरत हुनुहुन्थ्यो ।

यही २०७७ साल साउन २६ गते दिउँसोदेखि काठमाडौंबाट सम्पर्कविहीन रहनुभएका बानियाँकोे शव मकवानपुरको सिस्नेरीस्थित माण्डु जलविद्युत आयोजना स्थलमा भेटिएको नेपाल प्रहरीले जानकारी दिएको छ ।

महासंघ बानियाँको रहस्यमय ढंगले भएको निधन बारे गहिरो छानविन गरी सत्यतथ्य सार्वजनिक गर्न सरकारसंग माग गर्दछ । पत्रकार बानियाँले पत्रकारिता क्षेत्रमार्फत लोकतन्त्र, मानव अधिकार, विधिको शासन, प्रेस स्वतन्त्रता, पत्रकार सुरक्षा तथा नागरिक अधिकारको पक्षमा पु¥याउनु भएको अतुलनीय योगदानको उच्च कदर गर्दै महासंघ दिवंगत बानियाँप्रति भावपूर्ण श्रद्धाञ्जली व्यक्त गर्दछ । साथै, शोकसन्तप्त परिवारजनप्रति गहिरो समवेदना समेत व्यक्त गर्दछ ।

रमेश विष्ट
महासचिव