‘बुक बिल्डिङ्ग’ लागू भएसँगै १०० रुपैयाँमा नै आईपीओ जारी गर्नुपर्ने बाध्यता हट्यो

२८ साउन, काठमाडौं । नेपाल धितोपत्र बोर्डले ल्याएको नयाँ विधि-व्यवस्था अनुसार अब कम्पनीहरुले जारी गर्ने शेयरमा मूल्य बढाबढ गरेर शेयर बिक्री गर्न पाउने बाटो खुलेको छ । प्रारम्भिक सार्वजनिक निष्काशन (आईपीओ)मा बुक बिल्डिङ्ग विधि लागू भएपछि कम्पनीहरूले एक सय रूपैयाँमा नै सर्वसाधारणलाई बिक्री गर्नुपर्ने बाध्यत छैन ।

तर कम्पनीले कुल निष्काशित शेयरको निश्चित प्रतिशत शेयर मात्रै बढाबढ हुनेछ । बाँकी शेयर एक सय रूपैयाँमा नै सर्वसाधारण जारी गर्नु पर्ने छ । धितोपत्र दर्ता तथा निष्काशन नियमावली २०७३ को नियम २५ ‘ग’ ले बुक बिल्डिङ्ग विधिबाट प्रारम्भिक सार्वजनिक निष्काशन गर्न सक्ने व्यवस्था गरेको छ । यस सम्बन्धी थप प्रक्रियागत व्यवस्थाहरू निर्देशिकामा तोके बमोजिम हुने बोर्डले जनाएको छ ।

बुक बिल्डिङ्ग विधिलाई कार्यान्वयनमा ल्याउन बोर्डको सञ्चालक समितिको गत साउन २२ बैठकले बुक बिल्डिङ्ग निर्देशिका २०७७ लागू गरेको हो । बुक बिल्डिङ्ग निर्देशिकाले संगठित संस्थाले निष्काशन तथा विक्री प्रबन्धकको परामर्शमा धितोपत्रको अनुमानित मूल्य तथा मूल्यांकनको आधार र औचित्य समेत खुलाइएको प्रारम्भिक विवरणपत्र तयार गरी योग्य संस्थागत लगानीकर्तासँग छलफल कार्यक्रम रोडसो सञ्चालन गर्नुपर्ने छ ।

यसैगरी, न्यूनतम १० योग्य संस्थागत लगानीकर्तासँग खरिद गर्न चाहेको न्यूनतम धितोपत्र संख्या, खरिद आशय मूल्य तथा मूल्यांकनको आधार सहित प्रारम्भिक विवरणपत्रको सम्बन्धमा सुझाव प्राप्त गर्नुपर्नेछ । साथै, संगठित संस्थाले योग्य संस्थागत लगानीकर्ताबाट प्राप्त आशय मूल्यको अध्ययन गरी आधार मूल्य तय गर्नुपर्ने र उक्त आधार मूल्यमा २० प्रतिशत थप गर्दा कायमहुने मूल्य माथिल्लो सीमा र २० प्रतिशत घटाउदा कायमहुने मूल्य तल्लो सीमाहुने गरी मूल्य सीमा निर्धारण गर्नुपर्नेछ । सर्वसाधारणले धितोपत्र खरिदका लागि आवेदन दिने र बाँडफाँड गर्ने धितोपत्र संख्या भने न्यूनतम ५० किात्ता नै हुने व्यवस्था गरेको छ ।

हेर्नुहोस्, धितोपत्र बोर्डको विज्ञप्ति :

Scanned Image

Scanned Image