नक्कली नोट कारोबारी अन्सारी पक्राउ

२९ साउन, काठमाडौं । जाली नोट कारोबारी इल्ताफ हुसेन अन्सारी पक्राउ परेका छन् । जिल्ला प्रहरी कार्यालय, पर्साले अन्सारीलाई पक्राउ गरेको हो । काठमाडौंको कमलादीबाट बरामद भएको भनिएको १५ किलो सुन प्रकरण (साढे १४ किलो धाँतु, आधा किलो सुन)मा पनि मुछिएका अन्सारीलाई पक्राउ गरिएपनि प्रहरीले थप विवरण खुलाएको छैन् ।

सुन चोरीमा प्रयोग भएको बा ६ च ५५११ नम्बरको स्कोर्पियो गाडी उनको भएकै कारण थप अनुसन्धानका लागि पक्राउ गरिएको प्रहरीको भनाई छ । बाराको प्रस्टोखा–२, हरपुर घर भएका अन्सारी वीरगञ्जमा पेम्ट्रोल पम्प चलाउँछन् ।

२०६८ सालमा बरामद भएको ५४ लाख ९५ हजार नक्कली भारतीय रुपैयाँको कारोबार गरेको आरोपमा उनी पक्राउ परेका थिए । त्यसपछि पनि उनी नक्कली नोटको कारोबार गरेको आरोपमा पक्राउ परेका थिए ।

नक्कली नोट कारोबारका कुख्यात युनुस अन्सारीसँग पनि उनको निकट सम्बन्ध रहेको प्रहरीको भनाई छ ।