प्रभु इन्स्योरेन्स र एक्सेल डेभलपमेन्टको बोनस शेयर खातामा

२९ साउन, काठमाडौं । प्रभु इन्सुरेन्सले ५ प्रतिशत बोनस शेयर आफ्ना सेयरधनीको डिम्याट खातामा जम्मा गरिदिएको छ । इन्स्योरेन्सको गत माघ २४ गते सम्पन्न सभाले गत आर्थिक वर्षको नाफाबाट ५ प्रतिशत बोनस शेयर र ११.३२ प्रतिशत नगद लाभांश वितरण गर्ने प्रस्ताव पारित गरेअनुसारको शेयर खातामा पठाएको हो ।

कम्पनीले गत माघ ९ गतेसम्म शेयर डिम्याट गराएकाहरुको बोनस शेयर खातामा पठाइदिएको हो । माघ ९ पछि डिम्याट गर्नेहरुको बोनस शेयर पनि खातामै जम्मा गर्ने तयारी भइरहेको कम्पनीले जानकारी दिएको छ । तर, अहिलेसम्म पनि डिम्याट नगरेकाहरुले खातामा बोनस शेयर पाउनका लागि पहिला आफूसँग भएको भौतिक प्रमाणपत्र डिम्याट गर्नुपर्नेछ । अनिमात्र बोनस जम्मा गरिने कम्पनीले जनाएको छ ।

एक्सेलको बोनस पनि आयो
एक्सेल डेभलपमेन्ट बैंकले पनि १७.१ प्रतिशत बोनस शेयर सम्बन्धित शेयरधनीको डिम्याट खातामा जम्मा गरिदिएको छ । एक्सेलको गत असार १४ गते सम्पन्न सभाले गत आर्थिक वर्षको नाफाबाट १७.१० प्रतिशत बोनस शेयर वितरण गर्ने प्रस्ताव पारित गरेको थियो ।

बैंकले गत चैत ५ गतेसम्म शेयर डिम्याट गराएकाहरुको बोनस शेयर खातामा पठाइदिएको हो । चैत ६ पछि डिम्याट गर्नेहरुको बोनस शेयर पनि खातामै जम्मा गर्ने तयारी भइरहेको बैंकले जानकारी दिएको छ । अन्य कम्पनीको जस्तै एक्सेलले पनि अहिलेसम्म पनि डिम्याट नगरेकाहरुले खातामा बोनस शेयर पाउनका लागि पहिला आफूसँग भएको भौतिक प्रमाणपत्र डिम्याट गर्नुपर्ने बताएको छ ।