गुहार माग्दा सुनेनन्, पहिरोले सखाप बनाएपछि जनता बाँचेनन्

३० साउन, सिन्धुपाल्चोक । जुगल गाउँपालिका २ गोल्चे, लिदीमा पहिरोले ३७ घर ध्वस्त भएका छन् । लामाटोल नै ध्वस्त भएको बस्ती सार्न उनीहरुले यसअघि पटक पटक आग्रह गरेका थिए । तर कसैले सुनेनन् ।

जब शुक्रबार बिहान पहिरोले बस्ती नै ध्वस्त पारिदियो । सभामुख अग्नि सापकोटा हेलिकोप्टर लिएर मृत्यु नियाल्न पुगे । यसप्रति सिन्धुपाल्चोकका जनताले गुनासो गरेका छन् ।

शुक्रबार बिहान झरेको पहिरोमा ३८ जना बेपत्ता भएका छन्। पहिरोले ३७ घर ध्वस्त बनाएको छ। पहिरोमा परेर ९ जना घाइते भएका छन्। केही घाइतेको उद्धारपछि काठमाडौँ र चौतारा अस्पतालमा उपचार भइरहेको छ।

गत साउन २३ गते लिदीका बासिन्दाले गाउँ जोखिममा परेको भन्दै जिल्ला विपद् व्यवस्थापन समिति सिन्धुपाल्चोकमा जोखिमको पहिचान गरी स्थानान्तरण गर्न निवेदन दिएका थिए। बस्ती जोखिममा रहेको भन्दै स्थानीयले स्थानान्तरणका लागि माग गर्दासमेत विपद् व्यवस्थापन समितिका संयोजक रहेका प्रमुख जिल्ला अधिकारी उमेशकुमार ढकालले चासो दिएनन् । उनले माथिल्लो निकायमा पनि खबर गरेनन् ।

२६ मेगावाटको बलेफी ए हाइड्रोपावरुको सुरुङ निर्माणको क्रममा विस्फोटन गर्दा जमिन हल्लिँदा पहिरो गएको थियो । निवेदनमा नाम्फा, सञ्चगाउँ, लिदी, झुल्के, निम्लुङ, वैगाङसमेतका ५ सय भन्दा बढी घर जोखिममा परेको भनेर सुचना दिएका थिए ।

तर उनीहरुको गुहार त्यतिबेला न जिल्लाले सुन्यो न त जिल्लाले केन्द्रसम्म रिर्पोटिङ नै गर्यो । जब अहिले त्यही जोखिमयुक्त पहिरोको कारण ३८ जनाको सास लास भेट्न मुश्किल भयो, तब सभामुख सापकोटा, गृहमन्त्री रामबहादुर थापा बादल राहत लिएर पुगेका छन् । यसले जनताको दुःखप्रति नेताहरु कतिसम्म बेवास्ता छन् भन्ने देखाउँछ ।