कार्यकर्ताको रिहाइको माग गर्दै नेविसंघद्धारा आन्दोलनको घोषणा

३२ साउन, काठमाडौं । नेपाल विद्यार्थी संघले कार्यकर्ताको रिहाइको माग गर्दै आन्दोलनको घोषणा गरेको छ। त्रिभुवन विश्वविद्यालय र वीरगञ्जमा पक्राउ परेका कार्यकर्ता रिहाइको माग गर्दै केन्द्रिय समितिले आन्दोलनको घोषणा गरेहो हो ।

नेविसंघ अध्यक्ष राजिब ढुंगानाले आइतबार निकालेको विज्ञप्ति अनुसार भदौ १ गते देशभरका क्याम्पसमा तालाबन्दी गर्ने र भदौ २ मा प्रमुख शहरहरूमा १० जना उपस्थित भएर प्रदर्शन गर्ने उल्लेख गरिएकाे छ ।

यसअघि नेविसंघले शुक्रबार काठमाडौं उपत्यकाभित्रका सरकारी क्याम्पसमा तालाबन्दी गरेको थियो। त्रिविले आफ्ना माग सुनुवाइ नगरेको विरोधमा उपकुलपति कार्यालयलगायतमा नेविसंघले तोडफोड गरेपछि आठ जना पक्राउ परेका थिए।

नेविसंघले भने शान्तिपूर्ण आन्दोलनमा सहभागी नेविसंघ नेताहरूलाई झुटा मुद्दा लगाइएकोले आन्दोलन घोषणा गर्नु परेको बताएको छ। यस्तै वीरगञ्जमा निषेधाज्ञा उलंघनको आरोपमा नेविसंघका कार्यकर्ता पक्राउ परेका थिए। सिडिओलाई ज्ञापन पत्र दिन जाने भन्दै उनीहरूले प्रदर्शन गरेको प्रहरीको भनाइ छ।