गोरखामा अर्को हप्तादेखि निषेधाज्ञा जारी

३२ साउन, गोरखा । जिल्ला प्रशासन कार्यालय गोरखाले एकसातासम्म निषेधाज्ञा जारी गरेको छ । आइतबार बसेको जिल्ला स्तरीय कमाण्ड पोष्टको बैठकले भदौ ७ गते राति १२ बजेसम्म निषेधाज्ञा जारी गर्ने निर्णय गरेको हो ।

समुदाय स्तरमा कोरोना संक्रमित भेटिन थालेपछि संक्रमण रोकथाम तथा नियन्त्रणका लागि निषेधाज्ञा जारी गरिएको हो । प्रमुख जिल्ला अधिकारी तीर्थराज भट्टराईले निषेधाज्ञापछि जिल्लामा सार्वजनिक यातायात सञ्चालनमा पूर्ण रोक लगाइने छ । अत्यावश्यक प्रयोजनमा प्रयोग भएका बाहेक अन्य निजी सवारी पनि चल्न पाउने छैनन् ।

सवारी पासबाहेकका अन्य सवारी साधनलाई राति ९ बजेदेखि बिहान ६ बजेसम्म जिल्ला प्रवेशमा पूर्ण रोक लगाइने उनले जानकारी दिए । कोरोना संक्रमितको संख्या र जोखिम बढ्न थालेपछि गोरखामा निषेधाज्ञा जारी गरिएको हो ।