अब रहेनन भारतका पूर्व ओपनर चेतन चौहान

३२ साउन, एजेन्सी । कोरोना भाइरसको संक्रमणको कारण भारतका पूर्व ओपनर चेतन चौहानको निधन भएको छ ।ब्याट्सम्यान चौहानको आइतबार ७३ वर्षको उमेरमा निधन भएको हो ।

गत जुलाईमा कोरोनाको संक्रमण देखिएको चौहानलाई भेन्टिलेटरमा राखेर उपचार गरिएको थियो । तर, उनलाई बचाउन नसकिएको बताईएको छ ।

चौहानले भारतका लागि ४० टेस्ट र ७ एकदिवसीय खेलेका थिए । सन् १९६९ देखि १९८१ सम्म उनले भारतका लागि २ हजार २३७ रन बनाएका थिए ।

चौहानले २२ वर्षको उमेरमा न्युजिल्यान्डविरुद्ध १९६९ मा डेब्यु गरेका थिए । क्रिकेट खेल जीवनपछि उनी प्रशिक्षक बनेका थिए । यस्तै भारतीय टिमको व्यवस्थापक समेत बनेका थिए ।

उनी राजनीतिमा समेत लागेका थिए । उनी उत्तर प्रदेशको लोक सभामा दुई पटक सदस्य बनेका थिए । उनी उत्तर प्रदेश क्याबिनेटका मन्त्री समेत बनेका थिए ।