संक्रमण बढेपछि ४० जिल्लामा निषेधाज्ञा !

३२ साउन, काठमाडौं । कोरोना भाइरसको संक्रमण बढ्दै गएपछि ४० जिल्लामा निषेधाज्ञा जारी गरिएको छ । ४० जिल्लाका जिल्ला प्रशासन कार्यालयले कोरोना भाइरसको संक्रमण बढ्दै गएकाले निषेधाज्ञा जारी गरेका हुन् ।

१२ दिनअघि जिल्ला प्रहरी कार्यालय सप्तरीबाट सुरु भएको निषेधाज्ञा गोरखासम्म पुगिसकेको छ । अझै केही जिल्लामा निषेधाज्ञा जारी गर्ने क्रम चलेकै छ । तर कार्यान्वयन हुन बाँकी छ । सप्तरी, धनुषा, नुवाकोट, बाँके, महोत्तरी, सुनसरी, सर्लाही, स्याङ्जा, सिरहा, बर्दिया, बझाङ, मोरङ, दार्चुला, झापाले निषेधाज्ञा जारी गरिसकेका छन् ।

यस्तै कञ्चनपुर, काठमाडौं, ललितपुर, भक्तपुर, रौतहट, रुपन्देही, कैलाली, मकवानपुर, कपिलवस्तु, धादिङ, रुकुम पश्चिम, धनकुटा, तनहुँ, उदयपुर, सुर्खेत, चितवन, नवलपरासी पश्चिम, सिन्धुपाल्चोक, बाग्लुङ र गोरखा जिप्रकाले अवधि तोकेर निषेधाज्ञा जारी गरेका छन् ।

बारा, पर्सा, जुम्ला, पाल्पा र रामेछापले सिल गरेका छन् । यस्तै पाल्पाको तानसेन नगरपालिका र रामेछापको रामेछाप नगरपालिकाले पनि निषेधाज्ञा गरेका छन् ।

यस्तै कोरोना भाइरसको संक्रमण बढेपछि देशका विभिन्न २८ वटा स्थानीय तहले लकडाउन घोषणा गरेका छन् । संक्रमितको संख्या साढे २६ हजार नाघेको छ भने १७ हजार निको भएका छन् । कोरोना नियन्त्रणमै रहेका बेला १ सय ५ जनाले कोरोनाकै कारण ज्यान गुमाइसकेका छन् ।