कोरोनाले बुधबार ७ जनाको मृत्यु

३ भदौ, काठमाडौं । बुधबार मात्रै कोरोना भाइरसको संक्रमणबाट ७ जनाको मृत्यु भएको छ । पर्सामा दुई जनाको मृत्यु भएको छ भने काठमाडौं, भक्तपुर, मकवानपुर र सुनसरीमा एक एक जना गरी ७ जनाको मृत्यु भएको हो ।

वीरगञ्ज महानगरपालिका भिश्वा बस्ने ५७ वर्षीयको उपचारका लागि नारायणी अस्पतालमा लगिएकोमा मंगलबार दिउँसो ३ः३० बजे मृत्यु भएको हो । जिन एक्स्पर्ट विधिमार्फत कोरोना परीक्षण गर्दा कोरोना पोजेटिभ आएको थियो ।

वीरगञ्ज–४ विर्ता बस्ने ८४ वर्षीय कोरोना संक्रमित पुरुषको गण्डक अस्पतालमा उपचारका क्रममा मंगलबार राति मृत्यु भयो । सुनसरीमा ७१ वर्षीया महिलाको बुधबार धरानस्थित वीपी कोइराला स्वास्थ्य विज्ञान प्रतिष्ठानमा उपचारको क्रममा मृत्यु भएको हो ।

यस्तै भक्तपुर, सूर्यविनायककी ६१ वर्षीया महिलाको पाटन अस्पतालमा उपचारका क्रममा मृत्यु भएको छ । यस्तै मकवानपुरको हेटौंडा उपमहानगरपालिका १ चौकीटोलकी ६१ वर्षका पुरुषमा मृत्युपछि संक्रमण पुष्टि भएको छ ।

काठमाडौं महानगरपालिका असनका ९४ वर्षका वृद्धको मृत्युपछि कोरोना संक्रमण पुष्टि भएको छ । उनको यसअघि नै मृत्यु भएपनि आज मात्रै कोरोनाबाट ज्यान गएको पुष्टि भएको हो ।

वीरगञ्ज महानगरपालिका रेशमकोठीकी कोरोना संक्रमित ४० वर्षीया महिलाको वीरगञ्ज हेल्थ केयर कोभिड अस्पतालमा उपचारको क्रममा बुधबार दिउँसो सवा ४ बजे मृत्यु भएको हो । यससँगैँ नेपालमा कोराना संक्रमणबाट मृत्यु हुनेको संख्या १२४ पुगेको छ ।

बुधबार मात्रै ६ सय ८१ जनामा संक्रमण पुष्टि भएको थियो । यससँगै नेपालमा कोरोना संक्रमितको २७ हजार नाघेको छ । यसमध्ये १८ हजार उपचारपछि निको भएर घर फर्किएका छन् । पछिल्लो समय संक्रमितको ज्यान जान थालेपछि सरकारले उपत्यकासहित विभिन्न ठाउँमा निषेधाज्ञा जारी गरेको छ।