निषेधाज्ञामा बैंकका सीईओ र कर्मचारीमाथि प्रहरी अत्याचार, आज उपत्यकाका बैंक बन्द !

४ भदौ, काठमाडौं । प्रहरीले निषेधाज्ञाका क्रममा बैंकका कर्मचारीहरुलाई समेत रोकेपछि सेवा दिन बैंकरहरुले अस्वीकार गरेका छन् । जबकी बैंक तथा वित्तीय संस्थाहरु सरकारले नै तोकेको अत्यावश्यक सेवा भित्र पर्छन् ।

डीउटीमा खटिएका प्रहरीले बैंकका सीईओ तथा कर्मचारीहरुलाई बाटैमा रोकेपछि नेपाल बैंकर्स संघले आज बैंकका शाखा नखोल्न निर्देशन दिएको छ । साथै उसले प्रहरीले ज्यादतीपूर्ण व्यवहार गरेको भन्दै आज एकदिनका लागि शाखा नखोलेर विरोध जनाएको पनि स्पष्ट पारेको छ ।

नेपाल बैंकर्स संघका अध्यक्ष भुवनकुमार दाहालले ‘प्रहरीले बैंकका कर्मचारीलाई दुःख दिएकाले आज बैंक नखोल्ने बताए । काठमाडौं उपत्यकामा गएराति १२ बजेदेखि निषेधाज्ञा छ । निषेधाज्ञा पालना गराउन सडकमा खटिएका नेपाल प्रहरी र ट्राफिक प्रहरीले ठाउँठाउँमा बैंकका कर्मचारीहरु पनि रोकिदिएका छन् ।

सहमति विपरित सडकमै रोकियो !

बैंकर्स संघका अध्यक्ष दाहालका अनुसार सीडीओसँग समन्वय गरी हरेक बैंकका काठमाडौंमा पाँच वटा, भक्तपुरमा १ वटा र ललितपुरमा २ वटा गरी आठ वटा शाखा खोल्ने सहमति भएको थियो ।

यस सहमतिअनुसार बैंकका कर्मचारीलाई बैंककै परिचयपत्र देखाएर आउजाउ गर्न दिने भनिएको थियो । तर बिहान बैंक खोल्न जान लागेकाहरुलाई पनि रोकेपछि आज बाध्य भएर सेवा दिन नसकिने बैंकर्स संघको भनाई छ ।

यसरी बाटैमा रोकिनेमा बैंकका सीईओ समेत छन् । बैंकका सीईओ पनि बाटैमा रोकिएको गुनासो आएपछि ट्राफिक प्रहरीले आवश्यक समन्वयको काम अगाडी बढाएको जनाएको छ । बैंकका कर्मचारीलाई रोक्ने आदेश भने गृहमन्त्रालयले दिएको प्रहरीको दाबी छ ।

ट्राफिक प्रहरी महाशाखा प्रमुख भीमप्रसाद ढकालले बैंकका सीईओको गुनासो आएपछि उनीहरुलाई छाड्ने काम भइरहेको बताए ।

जिल्ला प्रशासन कार्यालयले एक साताको लागि उपत्यकामा निशेधाज्ञा जारी गरे पनि न्यूनतम बैंकिङ सेवालाई सुचारु राख्न प्रशासनले सहमति लिएको थियो । सो सहमतिपछि राष्ट्र बैंकले बुधबार बैंक तथा वित्तीय संस्थालाई न्यूनतम कारोबार सूचारु राख्न निर्देशन दिएको थियो ।