आज रातीदेखि कञ्चनपुरमा निषेधाज्ञा

४ भदौ, कञ्चनपुर । जिल्ला प्रशासन कार्यालय कञ्चनपुरले कोरोना भाइरस सङ्क्रमण न्यूनीकरणका लागि आज मध्यरात १२ बजेदेखि लागू हुने गरी निषेधाज्ञा जारी गर्ने निर्णय गरेको छ ।

कञ्चनपुरका प्रमुख जिल्ला अधिकारी नुरहरि खतिवडाले तीज र गौरा पर्वमा यहाँ भीडभाड हुनसक्ने भएकाले आगामी भदौ १४ गते राति १२ बजेसम्मका लागि निषेधाज्ञा जारी गरिएको बताए ।

उनले निषेधाज्ञा अवधिमा अत्यावश्यक सेवा तथा वस्तु बाहेकका अन्य सबै प्रकारका उद्योग, व्यापार व्यवसाय सञ्चालन गर्न नपाइने बताए । यस्तै जिल्लामै कोरोना भाइरस सङ्क्रमण परीक्षणका लागि कञ्चनपुरको भीमदत्त नगरपालिकाले रु ३८ लाखमा पिसीआर मेसिन खरिद गरेको छ ।

मुलुकमा बढ्दै गइरहेको सङ्क्रमण न्यूनीकरणका लागि परीक्षणलाई व्यापक बनाउन नगरपालिकाले आफ्नै लगानीमा पिसीआर मेसिन खरिद गरेको नगरपालिका कार्यालयका खरिद एकाइका प्रमुख इन्जिनियर हिमालयसिंह ऐरले जानकारी दिए ।

उनले नगरपालिकाले आह्वान गरेको सार्वजनिक सूचनाअनुसार सुदीप इन्टरनेशनलले रु ३८ लाखमा खरिद गरी नगरपालिकालाई उपलब्ध गराएको बताए ।