विदेशबाट आएपछि होटलमा बस्नैपर्ने, अरु जिल्लाबाट काठमाडौं छिर्नै नपाइने !

४ भदौ, काठमाडौं । सरकारले विदेशमा अलपत्र नेपालीको उद्धार प्रक्रिया नरोक्ने भएको छ । विदेशमा दुःख पाएका नेपालीको उद्धार प्रक्रिया रोकेपछि आलोचित बनेको सरकारले पुन चाटर्ड उडान शुरु गर्ने निर्णय गरेको हो । तर उद्धार भएर आएपछि अनिवार्य रुपमा होटलमा बस्नुपर्ने भएको छ ।

यस्तै कोरोनाबाट राजधानीलाई सुरक्षित राख्न कुनै जिल्लाबाट पनि काठमाडौं छिर्न पाइनेछैन । उपत्यका भित्रिने सबै नाकामा सुरक्षा व्यवस्था कडाई पारिने भएको छ । बिहीबार बसेको मन्त्रिपरिषद बैठकले कोरोना नियन्त्रण गर्न उपत्यकामा भित्रिनेलाई कडाई गर्ने निर्णय गरेको हो ।

विदेशबाट आउनेले अब पहिल्यै क्वारेन्टाइन पक्का गर्नुपर्नेछ । काठमाडौं झर्नेवित्तिकै होटलमा बस्नुपर्ने मापदण्ड सरकारले तयार पारेको छ । कम्तीमा ७ दिन क्वारेन्टाइनमा बसेपछि उनीहरु घर जान पाउनेछन् ।

क्वारेन्टाइन बनाइएका होटलको सूची भने सरकारले नै सार्वजनिक गर्नेछ । यस्तै एकदिनमा बढीमा तीनवटा फ्लाइटसम्म मात्रै सरकारले उडान अनुमति दिने भएको छ । अब पहुँचभन्दा अलपत्र नेपालीको माग भएको खण्डमा मात्रै उद्धार हुनेछ ।

कोरोना रोकथाममा केन्द्रित मन्त्रिपरिषद बैठकले उपत्यका भित्रिने १० वटै नाकामा कडाई गर्ने निर्णय गरिएको छ । अति आवश्यक कामले काठमाडौं छिरेकालाई पनि अनिवार्य होटलमा बस्नुपर्ने नियम लागु गरिएको छ ।

होटल खर्च भने आफैले व्यहोर्नुपर्ने छ । कोरोनाको अवस्था हेरेर जिल्लाको सुरक्षा व्यवस्थालाई कडाई गर्ने अधिकार प्रमुख जिल्ला अधिकारीलाई दिइएको छ ।