कालिकोटमा पनि आज रातीदेखि निषेधाज्ञा जारी

५ भदौ, कालीकोट । कालीकोटमा पनि निषेधाज्ञा जारी गरिएको छ । कोभिड १९ संकट व्यवस्थापन केन्द्र कालीकोटको शुक्रबार बसेको बैठकको निर्णयअनुसार जिल्ला प्रशासन कार्यालय कालीकोटले शुक्रबार राति १२ बजेदेखि लागू हुने गरी १० गते राति १२ बजेसम्मका लागि निषेधाज्ञा जारी गरेको हो ।

कोरोना भाइरस कोभिड १९ संक्रमण नियन्त्रण तथा रोकथामलाई थप प्रभावकारी बनाउन निषेधाज्ञा जारी गर्नु परेको प्रमुख जिल्ला अधिकारी चन्द्रप्रसाद गैरेले जानकारी दिए । चाडपर्वका बेला हुने भिडभाडका कारण कोरोनाको संक्रमण फैलिने जोखिम भएकोले पनि निषेधाज्ञा जारी गरिएको हो ।

निषेधाज्ञा अवधिभर अत्यावश्यकबाहेकका सबै सेवाहरू बन्द रहनेछन् । कर्णालीका सुर्खेत, जुम्लामा यसअघि नै निषेधाज्ञा जारी गरिएको छ ।