अब लक्षण नदेखिएका संक्रमितलाई घरमै राखिने

५ भदौ, काठमाडौं । अब लक्षण नदेखिएका कोरोना संक्रमितलाई घरमै राखिने भएको छ । बिहीबार बसेको मन्त्रिपरिषद बैठकले लक्षण नदेखिएका संक्रमितलाई घरमै राख्ने निर्णय गरेको हो । प्राविधिक विश्लेषणले पनि लक्षण नदेखिएका कोरोना संक्रमित होम आइसोलेसनमा रहँदा चाँडो निको हुने देखिएपछि उनीहरुलाई घरमै राख्ने निर्णय भएको सरकारका प्रवक्ता अर्थमन्त्री युवराज खतिवडाको भनाई छ ।

पछिल्लो समय अस्पतालका आइसोलेसन बेड भरिन थालेपछि सरकारले लक्षण नदेखिएका बिरामीलाई घरमै राख्ने निर्णय गरेको हो । यसले थोरै भएपनि घरमै रहेका संक्रमितलाई आवश्यक सहयोग पुग्ने अपेक्षा छ ।

यसैबीच सरकारले विदेशबाट उद्धार गरिने नेपालीलाई एकिकृत क्वारेन्टिनमा राखिने जनाएको छ। एकिकृत काठमाडौं उपत्यकामा तयार गरिने र त्यसको व्यवस्थापन नेपाली सेनाले गर्ने प्रवक्ता खतिवडाले बताए । विदेशबाट आएकालाई अनिवार्य एक हप्ता क्वारेन्टाइनमा राखिने र होलटमा बस्ने खर्च यात्रु स्वंयमले व्यहोर्नुपर्नेछ ।