मेस्सीलाई बेच्ने बार्सिलोनाको तयारी

५ भदौ, एजेन्सी । आधुनिक फूटबलका जादु भनेर चिनिएका लियोनल मेस्सीलाई बेच्ने बारेमा स्पेनिस क्लब बार्सिलोनाका पदाधिकारीबीचमा बहस शुरु भएको छ । मेस्सीको बढ्दो उमेर र प्रदर्शनका विषयमा असन्तुष्ट रहदै बोर्डका पदाधिकारबीच मेस्सीलाई बेच्ने विषयमा छलफल शुरु भएको फुटबल समाचार एजेन्सीले बताएका छन् । शूरुदेखि नै बार्सिलोनाका लागि खेलिरहेका मेस्सीलाई बेच्नेबारेमा बोर्डका पदाधिकारीबीच पहिलोपटक छलफल भएको हो । जसलाई महत्वका साथ हेरिएको छ ।

बार्सिलोना लगातार पाँचौ पटक च्याम्पियन्स लिग फुटबलको क्वाटरफाइनलबाटै आउट भएपछि क्याटलान क्लबमा मेस्सीमाथि प्रश्न उठेको छ । यसअघि बार्सिलोनाले सन् २०१५ मा च्याम्पियन्स लिग जितेको थियो । त्यसयता क्लबले तीन पटक ला लिगा उपाधि जितेपनि च्याम्पियन्स लिगको नजिक पनि पुग्न सकेको छैन् ।

यसपटक क्वाटरफाइनलमा जर्मन क्लब बायर्न म्युनिखसँग ८-२ को फराकिलो अन्तरले टिम पराजित भएपछि बार्सिलोनामा एक किसीमले भूकम्प गएको छ । यो नतिजाका पछाडी क्लबमा खेलाडीको उमेर, प्रदर्शन र मेस्सीको घमण्ड कारक रहेको भनिएको छ ।

मेस्सीले पछिल्लो समय आफैले पनि जादुयी प्रदर्शन गर्न नसकेको, टिमलाई मिलाउन नसकेको, प्रशिक्षकसँग राम्रो सम्बन्ध बनाउन नसकेको र बोर्डका पदाधिकारीसँग पनि बढी माग राखेर विवाद मात्रै सिर्जना गरेको आरोप छ । मेस्सीको बढ्दो उमेर र खस्किदो प्रदर्शनका कारण बार्सिलोनाले पहिलोपटक उनलाई बेच्ने बारेमा छलफल शुरु गरेको हो ।

हाल ३३ बर्षका मेस्सीले क्षमताअनुसार प्रदर्शन गर्न नसक्दा यसै सिजन वा कम्तीमा अर्को सिजन क्लबबाट बाहिरिन सक्ने अनुमान गरिएको छ । यसअघि रोनाल्डोले सन् २०१७ को सिजनमा गतिलोसँग गोल गर्न मात्रै नसक्दा रियल मड्रिडले उनलाई बेचिदिएको थियो ।

लगातार तीन पटक च्याम्पियन्स लिग जितेका रोनाल्डोले एक सिजन लय गुमाउँदा क्लब नै छाड्नुपरेको थियो । रोनाल्डो रियल छाडेर युभेन्ट्स गएपछि ला लिगामा मेस्सीको भाग्य पनि चम्किन सकेको छैन भने विस्तारै प्रदर्शन पनि ओरालो लाग्दै गएको छ ।