रहेनन् राजविराज नगरपालिकाका पूर्वउपप्रधान, कोरोना संक्रमणबाट मृत्यु भएको पुष्टि

◊ धीरुभाइ

७ भदौ सप्तरी । नेपाली कांग्रेसका नेता तथा राजविराज नगरपालिकाका पूर्व उपप्रधान मुरारीप्रसाद उपाध्यायको ७६ वर्षको उमेरमा निधन भएको छ। राजविराज नगरपालिका–७ निवासी उपाध्यायको उपचारका क्रममा काठमाडौंको ग्राण्डी हस्पिटलमा शुक्रबार निधन भएको परिवारिक सदस्यले बताए ।

उपाध्यायले राजविराजमै पीसीआर परीक्षणका लागि नाम दर्ता गराएपनि लगातार ज्वरो र निमोनिया भएपछि एक साता अघि उपचारका लागि उनी काठमाडौं गएका थिए । स्वास्थ्य तथा जनसख्या मन्त्रालयले उनको कोरोनाको संक्रमणबाट मृत्यु भएको शुक्रबार पुष्टि गरेको छ ।

अस्पतालमा उपचारार्थ भर्ना भएका उनको बिहीबार निजी क्लिनिकमा स्वाब संकलन गरी पीसीआर परीक्षण गरिएको थियो । मृत्यु पश्चात नेपाली सेनाको निगरानीमा काठमाडौं पशुपतिमा रहेको विद्युतिय शवदाह गृहमा अन्त्येष्टि गरिएको छ ।

मन्त्रालयले कोरोनाको संक्रमणबाट मृत्यु भएको पुष्टि गरेपछि खोजतालास गर्दा शनिबार मात्र स्वास्थ्य कार्यालय सप्तरीले जानकारी पाएको स्वास्थ्य कार्यालय सप्तरीका निमित्त प्रमुख दुनियालाल यादवले बताए । यससँगै सप्तरीमा कोरोनाबाट मृत्यु हुनेको सख्या पाँच पुगेको छ । मृतकमा ‘प्रोस्टेट’ को रोगले पीडित मृतकको पिसाब रोकिएर महिना दुई महिनामा ज्वरो आइरहने गर्दथ्यो ।

बिद्यार्थी कालदेखि नै राजनीतिमा सक्रिय उपाध्याय नेपाली कांग्रेस सप्तरीको क्षेत्रीय सभापति समेत बनेका थिए । वि.स. २०४३ साल चैतमा भएको स्थानीय तहको निर्वाचनमा राजविराजको चार वटा वडाको मतदानमा धाँधली भएको भन्दै उम्मेदवारहरुले गरेको अनसनलगायतको आन्दोलन सफल भएपछि ०४४ साल बैशाखमा पुनः भएको निर्वाचनमा उनी उपप्रधान पञ्चमा निर्वाचित भएका थिए । चार वटा बुथको मतदानमा धाँधली भएको भन्दै जारी १२ दिनको अनसन पछि ०४४ बैशाख ४ गते राजविराज नगरपालिकाको सबै १० वटा वडामा पुनः निर्वाचन भएको थियो।

उपाध्याय विरामीको सेवा र अस्पतालमा कुरुवा बस्न २०२६ देखि २०७६ सालसम्म अग्रसर रहेका निडर, क्रान्तिकारी र सामाजिक सेवभावका व्यक्ति भएको उनीसँगै प्रधानपञ्च बनेका गोबिन्द सिंहले बताए । मृतक उपाध्यायका एक श्रीमति, दुई छोरा र तीन छोरी छन ्।