आज ७४३ जनामा कोरोना संक्रमण, काठमाडौं उपत्यकामा मात्रै २२४ जना, मृतकको संख्या १५७ पुग्यो

८ भदौ, काठमाडौं । दिन प्रतिदिन कोरोना संक्रमितको संख्या बढ्दै जान थालेको छ । आज मात्रै देशभर ७४३ जना नयाँ कोरोना संक्रमित थपिएका छन् । स्वास्थ्य तथा जनसंख्या मन्त्रालयका अनुसार १० हजार २ सय ३४ पीसीआर परीक्षणमा ७४३ जनामा संक्रमण पुष्टि भएको हो ।

आजसम्म कुल संक्रमितको संख्या ३२ हजार ६७८ रहेका छन् । पछिल्लो २४ घण्टामा १७५ जना कोरोना संक्रमण निको भई डिस्चार्ज भएका छन् । सोमबारसम्म डिस्चार्ज हुनेको संख्या १८ हजार ८०६ रहेको छ । हालसम्म सक्रिय संक्रमितको संख्या १३ हजार ७१५ रहेको छ भने संस्थागत आइसोलेशनमा ९ हजार १५४ र होम आइसोलेशनमा ४५६१ जना रहेका छन् ।

बितेको २४ घण्टामा काठमाडौं उपत्यकामा २२४ जनामा कोरोना संक्रमित थपिएका छन् । मन्त्रालयका अनुसार काठमाडौं जिल्लामा १७७, ललितपुरमा ३३ र भक्तपुरमा १४ जनामा संक्रमण पुष्टि भएको छ ।

यसैबीच कोरोना भाइरसबाट पछिल्लो २४ घण्टामा सुनसरीका १, मोरङका १, पर्साका १, काठमाडौंका १, रुपन्देहीका ४ जना गरी ८ जनाको मृत्यु भएको जानकारी दिइएको छ । यससँगै मृतकको कुल संख्या १५७ पुगेको छ ।