लकडाउनमा म्याद सकिएका लाइसेन्सको नवीकरण जरिवाना छुट

८ भदौ, काठमाडौं । निषेधाज्ञा थप गरिएपछि यातायात व्यवस्था विभागले सवारी लाइसेन्स धनीलाई विशेष छुट दिएको छ । चैत ११ पछिको लकडाउन अवधिमा लाइसेन्सको म्याद सकिएर पनि नवीकरण गर्न नपाएका सवारी धनीलाई जरिवाना तिर्नु नपर्ने व्यवस्था विभागले गरेको हो ।

विभागले सूचना जारी गर्दै लकडाउन अवधिमा म्याद सकिएका सवारी धनीले भदौ मसान्तसम्म नवीकरण गर्दा जरिवाना तिर्नुनपर्ने जानकारी दिएको हो ।

यसअघि पनि यस्तो सुविधा दिने भनिएपनि प्रणालीमा त्यस्तो छुट दिने गरी व्यवस्था नगर्दा यातायात कार्यालयले जरिवाना उठाएका थिए । अहिले विभागले सिस्टमलाई ‘मोडिफिकेसन’ गरेर भदौसम्म नवीकरण गर्दा जरिवाना नलाग्ने व्यवस्था गरेको हो ।

पछिल्लो समय लकडाउनका कारण नवीकरण गर्ने र कर तिर्नेको ठूलो संख्या कार्यालयमा देखिने गरेको थियो ।