पहिरोले नहर भत्काएपछि लघुजलविद्युत बन्द, तीन सय घरधुरीमा सेवा अवरुद्ध

८ भदौ, सल्यान । बाफुखोलामा पहिराेले लघुजलविद्युतकाे  नहर भत्काएपछि विद्युत् सेवा अवरुद्ध भएको छ । स्थानीय ओख्रेनी खोलाबाट निकालिएको जलविद्युत् यही भदौ ३ गते आएको अविरल वर्षापछिको पहिरोले नहर तथा विद्युतका खम्बासमेत बगाएपछि तीन सय घरधुरीमा विद्युत् सेवा अवरुद्ध भएको हो ।

पहिराले नहर तथा विद्युतका ६५ पोल तथा तारसमेत बगाएपछि विद्युत् अवरुद्ध भएको विजय लघु जलविद्युत् केन्द्रका अध्यक्ष सुनिल केसीले जानकारी दिए । पहिरोले विद्युत्का पोल बगाएपछि तारसमेत तहसनहस भएको केसीको भनाइ छ । “अविरल वर्षाका कारण विद्युत् उत्पादनगृहमा समेत क्षति पुगेको छ, बाढी नै उत्पादनगृहमा पसेपछि क्षति पुगेको छ”, अध्यक्ष केसीले भने ।

बाढीका कारण विद्युत् उत्पादन गृहसमेत जोखिममा रहेको अध्यक्ष केसीले बताए ।“दुई खोलाबाट आएको बाढी उत्पादन गृहमा पसेको छ, यसले भवनसमेत उच्च जोखिममा छ, यसलाई मर्मतसम्भार नगरी विद्युत् उत्पादन गर्न सकिने अवस्था छैन”, उनले भने ।

ओखेरनी, दोभान बजार, देउपरी बस्तीमा पहिराले ठूलो क्षति पु¥याएकाले बाँकी रहेका विद्युत्का पोलसमेत स्थानान्तरण गर्नुपर्ने अवस्था हुँदा समस्या रहेको बागचौर नगरपालिका–१२ का वडाध्यक्ष दीपककुमार वलीले जानकारी दिए। “पहिरो तथा बाढीले अहिले वडा नं. १२ का ७५ प्रतिशत जनता प्रभावित भएका छन्, त्यसमा विद्युत् पनि नराम्ररी प्रभावित भएकाले तत्काल मर्मतसम्भार गरेर बत्ती बाल्न सकिने अवस्था छैन”, वडाध्यक्ष वलीले भने । विद्युतमा मात्रै पहिराेले करिब रु २० लाख बराबरको क्षति पु¥याएको वडाध्यक्ष वलीको भनाइ छ ।