लकडाउन र निषेधाज्ञाले ग्याँस व्यापारीको कन्तबिजोक

८ भदौ, झापा । निरन्तरको लकडाउन र पटकपटकको निषेधाज्ञाका कारण देशमा रहेका सयौं उद्योगधन्धा, कलकारखानाहरु बन्द छन् । सिंगो मुलुक ठप्प छ । नागरिकहरु घरभित्रै बन्दीगृहजस्तो जीवन जिउन बाध्य छन् ।कोरोनाको कहरले घरभित्रै लुकेर भएपनि आम नागरिकलाई बाँच्नु परेको छ । विभिन्न अभावका बावजुद नागरिक भोलिको उज्यालो घामको आशामा आजको अध्यारो रात कटाउँदै छन् ।

बन्दाबन्दीको असर समग्र मुलुकमा परिरहेको बेला पूर्वका सिलिण्डर ग्याँसका व्यापारीहरु आफुहरु असाध्यै ठूलो मारमा रहेका बताउँछन् । दैनिक सय भन्दा बढी ग्याँस सिलिण्डर बेच्ने दमकका एकजना ग्याँसका व्यापारी भन्छन, अहिले दिनमा दशवटा ग्याँस बेच्न पनि धौ धौ परिरहेको छ ।

अहिले स्कूल कलेज बन्दछन्, डेरामा बस्ने सबैजसो बिद्यार्थीहरु र अन्यत्रबाट कामदारको रुपमा दमक आएर बसेकाहरु आ–आफ्ना घर गएका छन् । जसका कारण डेरामा बस्नेहरुको संख्या ह्वात्तै घटेर ग्याँस उपभोक्ताहरुको संख्या पनि घटेको छ । दमकमा दैनिक हजारौंका संख्यामा ग्याँस सिलिण्डर उपयोग गर्ने होटेल, रेष्टुरेन्ट, पार्टी प्यालेसहरु लामो समयदेखि बन्द भएका कारण ग्याँस बिक्रीमा अत्यन्तै धेरै गिरावट आएको छ ।

विवाह, पार्टी भोजहरुमा अत्यन्त धेरै उपयोग हुने सिलिण्डर ग्याँस अहिले यी सबै बन्दाबन्दीमा परेपछि ग्याँस व्यापारीहरुलाई ग्याँस सिलिण्डर बेचेर पसलको भाडा तिर्नसमेत धौ धौ परिरहेको छ । निरन्तरको बन्दाबन्दीले स्थानीय बासिन्दाहरुमा आम्दानीको श्रोत घटनाले पनि वैकल्पिक उर्जाको रुपमा दाउराको उपयोग हुन थालेपछि ग्याँस व्यवसाय पनि धरापमा पर्दै गैरहेको नाम नबताउने शर्तमा दमककै एक लब्ध प्रतिष्ठित अभिभावक तथा ग्याँस व्यापारी बताउँछन् ।