प्रम ओली विश्व बैंकको दवाब झेल्छन् तर भ्रष्टाचारीलाई कारवाही गर्दैनन् : कमल थापा

१० भदौ, काठमाडौं । प्रधानमन्त्री केपी शर्मा ओलीले विश्व बैंकको दवाब झेलेको तर भ्रष्टाचारीलाई कारवाही गर्न नसकेको प्रति संकेत गदै राप्रपा अध्यक्ष कमल थापाले आज एक ट्वीट गरेका छन् ।

विश्व बैंकको सहयोगमा किसानका लागि संचालित व्यवसायिक कृषि तथा व्यापार आयोजना (प्याक्ट) मा भएको व्यापक भ्रष्टाचार बारे राप्रपाका अध्यक्ष थापाले भ्रष्टाचारीलाई कारवाही नगरी प्रधानमन्त्री निरिह र कर्तव्यविमुढ भएको आरोप लगाएका हुन् ।

आज अध्यक्ष थापाले सामाजिक संजालमा लेखेका छन् “कृषि क्षेत्रमा भएको व्यापक भ्रष्टाचारको नालीबेली सार्वजनिक गरिएको छ । विश्व बैंकले पदाधिकारीको नाम समेत किटान गरी कारबाहीको लागि सरकार ध्यान आकर्षित गरेको छ । खुलेआम भईरहेको ब्रम्हलुटको किन छानविन हुँदैन ? प्रधानमन्त्री किन निरीह र किं कर्तब्य विमुढ हुनुहुन्छ ?” भनि प्रश्न गरेका छन् ।

विश्व बैंकको सहयोगमा किसानका लागि सञ्चालित व्यावसायिक कृषि तथा व्यापार आयोजना (प्याक्ट) मा भएको अनियमितताको चरम रुप विश्व बैंककै छानबिनले उजागर गरेको थियाे । अनियमितताको सांगोपांगाे चित्र देखाएको विश्व बैंकले यसका दोषीमाथि कारबाही गर्न सरकारलाई पत्र समेत पठाएको छ ।