चिकित्सकसहित कर्णालीमा दुई स्वास्थ्यकर्मी संक्रमित

१० भदौ, सुर्खेत । कर्णाली प्रदेशमा दुई जना स्वास्थ्यकर्मीलाई कोरोना संक्रमण पुष्टि भएको छ । कर्णाली प्रदेश अस्पताल सुर्खेतका एक चिकित्सक र अर्का एक स्वास्थ्यकर्मीमा कोरोना संक्रमण पुष्टि भएको हो ।

प्रदेश अस्पतालका अनुसार ओपीडीमा कार्यरत चिकित्सक र अस्पतालमा कार्यरत एक जना महिला स्वास्थ्यकर्मी रहेका छन् । उनीहरुमा संक्रमण देखिएपछि बुधबार नै ३५ जना अन्य चिकित्सक र कर्मचारीको स्वाब संकलन गरी परीक्षणका लागि पठाइएको छ ।

संक्रमित स्वास्थ्यकर्मीहरु २७ वर्षीय पुरुष र २९ वर्षीया महिला हुन् । यस्तै कर्णाली प्रदेशमा पछिल्लो २४ घण्टामा ६ जना नयाँ संक्रमित फेला परेका छन् । संक्रमितमध्ये सुर्खेतका चार जना, भक्तपुर र भारतका एक एक जना छन् ।