नेकपाभित्रको विवाद कायमै, प्रतिवेदनउपर सचिवालय बैठकमा उठ्छ कुरा
कुसुम सेञ्चुरी
भदौ १२, २०७७ शुक्रबार १९:३९:२८
१२ भदौ, काठमाडौं । सत्तारुढ नेपाल कम्युनिष्ट पार्टीमा देखिएको अन्तर्विरोध अन्त्य गर्न गठित कार्यदलको प्रतिवेदन उपर छलफल गर्न भोलि सचिवालय बैठक बस्दैछ । दुई अध्यक्षलाई झण्डै एकसाता अगाडि बुझाइएको १७ पन्ने प्रतिवेदनउपर भोलिको सचिवालय बैठकले कार्यविधि बनाउने तयारी छ । तर प्रतिवेदनमाथि नेता माधवकुमार नेपाल सन्तुष्ट नरहेको खबर सार्वजनिक भएको छ ।
यद्यपि नेता नेपालले भने आफूले कुनै प्रतिक्रिया नदिएको र सबै कुरा भोलिको सचिवालय बैठकमा राख्ने बताएका छन् । मूलतः प्रधानमन्त्री केपी ओलीलाई नै सहज हुनेगरी आएको प्रतिवेदनप्रति अर्का अध्यक्ष पुष्पकमल दाहाल ‘प्रचण्ड’समेत सहमत भएको प्रतीत हुन्छ । कार्यदलले बुझाएको प्रतिवेदन ०७५, मंसिर ४ गते दुई अध्यक्षीबीच भएको सहमतिलाई ब्याख्या गर्ने गरी आएको छ । त्यसैले माधव कम्रेडले फेरि दुई अध्यक्षको चोचोमोचो मिलेको जस्तो बुझेको उनी निकट स्रोतको भनाई छ ।
दुई अध्यक्षले गरेको पुरानो सम्झौतामा प्रतिनिधिसभाको यो कार्यकालभरि ओली प्रधानमन्त्री रहने र एकता महाधिवेशन नभइञ्जेल प्रचण्ड कार्यकारी अध्यक्ष रहने भनिएको थियो । अहिले त्यही पुरानो सहमतिलाई थप व्याख्या गर्नेगरी मात्रै प्रतिवेदन आएको छ, त्यसमा माधव कम्रेडको असहमति हुनेछ – उनले भने । स्रोतका अनुसार, अर्का नेता झलनाथ खनाल र प्रवक्ता नारायणकाजी श्रेष्ठलेसमेत भोलिको बैठकमा प्रतिवेदन अपूरो र एकांकी रहेको धारणा राख्ने भएका छन् ।
ओलीविरुद्ध हामीसँग समीकरण गरेका प्रचण्डले या त ओलीसँग सम्झौता गरे वा आत्मसमर्पण भन्दै नेता खनालले दुखेसो गर्ने गरेको पनि स्रोतको भनाई छ । यसबारे विस्तृत रुपमै छलफल गरिनेछ भन्दै स्रोतले प्रश्न ग¥यो– विगत तीन महिनादेखि प्रचण्डले गरेको रडाको आखिर केका लागि त ?
यही प्रश्न प्रचण्ड निकटहरुले समेत गर्न थालेपछि उनी स्पष्टीकरण दिन व्यस्त छन् । हरेक दिन प्रचण्डले निकट नेताहरुलाई ओलीसँग गोप्य सहमति नभएको तर अहिलेको लागि पार्टी एकता बचाउनकै लागि त्याग गरेको बताउने गरेका छन् । स्थायी कमिटी छलेर गोप्य रुपमा कार्यदल बनाएकोप्रति धेरैले आशंका गरेका छन् । प्रचण्डले जस्तोसुकै सम्झौता गरेको हुनसक्ने धेरैले अनुमान गरेका छन् ।
मूलत विधि प्रक्रिया र एक व्यक्ति एक पदको मुद्धालाई पूर्णत पाखा लगाएर दिइएको प्रतिवेदनले समस्याको दीर्घकालिन समाधान दिन नसक्ने बुझाई नेपाल खनाल पक्षको रहेको छ । पार्टी भित्रको मूल मुद्धा नै अलपत्र पारेर तयार गरिएको प्रतिवेदनले पार्टीलाई उर्जा दिन नसक्ने ठहर उनीहरुको रहेको छ ।
नेपाल निकट नेता रघुजी पन्तले पार्टीलाई नयाँ सोच र अवधारणामा लैजान हिजो समस्याको हल खोज्नै पर्छ भन्दै तर प्रस्तुत प्रतिवेदन त्यसबाट च्यूत भएको बताएका छन् । समस्याको चूरो नै नपहिल्याई समाधानको प्रस्ताव ल्याइनु भनेको अर्काे समस्यालाई जन्माउनुजस्तो हो भन्दै उनले त्यसबारे स्पष्ट नभएसम्म प्रतिवेदन कार्यान्वयनमा लैजान नहुने मत राखे । नेपाल र खनाल पक्षबाट कार्यदलमा प्रतिनिधित्व गराइएका भीम रावल र सुरेन्द्र पाण्डेले समेत यसको जवाफ दिनुपर्ने उनको तर्क छ । के आधारमा मूलभूत प्रश्नमा प्रतिवेदन केन्द्रित भएन ? त्यसको जवाफ हाम्रातर्फबाट प्रतिनिधित्व गर्ने साथीहरुले समेत दिनुपर्छ ।
बजारमा हल्ला चलेजस्तै अबको पुनर्गठनमा मन्त्री हुनका लागि नै रावल र पाण्डे मौन बसेको त हैन ? भन्ने प्रश्न पनि उठेको छ । पार्टीमा देखापरेको समस्याको हल खोज्न यस्तो कार्यदल आवश्यक नै नरहेको तर्क गर्ने बामदेव गौतम पनि अहिले मौन छन् । उनले पनि भोलिको बैठकमा आफ्ना धारणा राख्ने भएका छन् । दुई अध्यक्षबीच भएको छलफलकै बीच आफूखुशी कार्यदल बनाएकोमा गौतमले असन्तुष्टी व्यक्त गरेका थिए ।
उनी पनि कार्यदलको प्रतिवेदनप्रति सकारात्मक नरहेको स्रोतको भनाई छ । आफूले यसअघि स्थायी कमिटीमा पेश गरेकै ६ बुँदे समाधानको उपायबाटै समस्याको हल खोज्न सकिने धारणा उनले राख्दै आएका छन् । उनको समाधान सूत्रमा पनि ओलीलाई नै बलियो बनाउने उपाय सुझाइएको छ ।
कुसुम सेञ्चुरी
नेपालबहस डटकमकी समाचार सम्पादक/ समाचार प्रमुख कुसुम सेञ्चुरी राजनीति तथा समसामयिक विषयवस्तुमा कलम चलाउँछिन् । फुलवारी एफएमदेखि रेडियो पत्रकारिता शूरु गरेकी कुसुमले रासस, रेडियो अन्नपूर्ण र देशान्तर एफएममा पनि काम गरेकी छन् । केही समय उनले नाइस टीभीमा समाचार प्रस्तोताको रुपमा पनि कुशलतापूर्वक जिम्मेवारी निभाएकी छन् ।
लेखकबाट थपस्काउटको जग्गा कब्जामा गृहमन्त्रीको चासो, मन्त्रालयमा आयुक्तसँग छलफल
चैत १५, २०८० बिहिबार
आईजीपी परिर्वतनको तयारीमा गृहमन्त्री लामिछाने, पुग्ला त चलाउनेको भविष्यवाणी ?
चैत १५, २०८० बिहिबार
८ सय ७७ प्रहरी काजबाट फिर्ता
चैत १५, २०८० बिहिबार
देशमा अर्को उथलपुथल हुनेवाला छः प्रधानमन्त्री प्रचण्ड
चैत १५, २०८० बिहिबार
सादा पोशाकमा प्रहरी परिचालन नगर्न हेडक्वार्टरको पत्र
चैत १५, २०८० बिहिबार
हेलम्बुमा हाइअल्टिच्युड भलिबल प्रतियोगिता हुने
चैत १६, २०८० शुक्रबार
सिद्धि हाइड्रो कम्पनीको शेयर निष्कासन तथा बिक्री प्रबन्धकमा सिटिजन्स क्यापिटल
चैत १६, २०८० शुक्रबार
अतिथि सत्कार घरबासमा विदेशी पर्यटक बढ्दै
चैत १६, २०८० शुक्रबार
देउडा खेल्दै सर्वसाधारण
चैत १६, २०८० शुक्रबार
उप निर्वाचनलक्षित एजेन्डा पासगर्दै किसान महासंघ केन्द्रीय समितिको बैठक इलाममा सम्पन्न
चैत १६, २०८० शुक्रबार
धार्मिक पर्यटकीय स्थल बिम गाउँ
चैत १६, २०८० शुक्रबार