काठमाडौं, पोखरा र बुटवलमा तीन जना संक्रमितको मृत्यु

१२ भदौ, काठमाडौं । काठमाडौं, पोखरा र बुटवलमा गरी तीन जना कोरोना संक्रमितको मृत्यु भएको छ । काठमाडौंको त्रिवि शिक्षण अस्पतालमा उपचारका क्रममा मृत्यु भएका पुरुषमा कोरोना संक्रमण पुष्टि भएको छ । उदयपुरको त्रियुगा नगरपालिकाका ५२ वर्षीय पुरुषको गएको ९ गते मृत्यु भएको थियो ।

मृत्यु भएपछि परीक्षण गर्दा उनमा संक्रमण पुष्टि भएको हो । यस्तै लमजुङका कोरोना संक्रमितको पोखरामा मृत्यु भएको छ । पोखरा स्वास्थ्य विज्ञान प्रतिष्ठानको कोभिड–१९ उपचार केन्द्रको आइसोलेसनमा शुक्रबार उनको मृत्यु भएको हो ।

बिहीबार प्रतिष्ठानमै स्वाब दिएर घर फर्किएका लमजुङको मध्यनेपाल नगरपालिका ७ करापुटारका ५२ वर्षीय पुरुषको उपचारका लागि अस्प्ताल लैजादै गर्दा मृत्यु भएको हो । श्वासप्रश्वासको समस्याले गेटमै ढलेपछि उनको मृत्यु भएको हो । लगत्तै रिर्पोट हेर्दा पोजेटिभ आएको अस्पतालले जनाएको छ ।

यस्तै बुटवलको कोरोना अस्पतालमा एक जनाको मृत्यु भएको छ । भदौ ७ गते अस्पतालमा भर्ना भएका तिलोत्तमा नगरपालिका वडानम्बर ४ का ६० वर्षीय पुरुषको बिहीबार राति मृत्यु भएको हो ।