हुर्कले कोरोना प्रभावित हरवाचरवा परिवारलाई राहत वितरण गरे

धीरुभाइ

१३ भदौ सप्तरी । फ्रिडम फण्डको सहयोगमा मानव अधिकार तथा ग्रामिण युवा परिवर्तन(हुर्क) नेपालले कोरोना भाइरसका कारण लगातारको लकडाउन तथा जारी निषेधाज्ञाबाट अति प्रभावित गिरहतको हलो जोतेर गुजारा गर्ने हरवाचरवा परिवारलाई शनिबार राहत वितरण गरेको छ ।

हुर्क नेपालले गिरहतको हलोमा जिविका आश्रित सप्तरीको तिलाठी कोइलाडी गाउँपालिका वार्ड नम्बर ४ र ५ कोइलाडी बर्साइनका हरवाचरवा २२५ परिवारलाई राहत वितरण गरेको हो । कोरोना भाइरस (कोभिड १९) संक्रमण तथा रोकथामका लागि पाँच महिना भन्दा बढी समयदेखि लगातारको लकडाउन र त्यसपछि लगातार निषेधाज्ञाका कारण अति प्रभावित हरवाचरवा प्रति परिवार १५ किलो चामल, पाँच किलो गहुँको पिठो, एक किलो नून, एक किलो आलु, सेनिटाइजर, तीन वटा साबुन वितरण गरेको छ ।

मानव अधिकार तथा ग्रामिण युवा परिवर्तन(हुर्क) नेपालका अध्यक्ष तथा नेविसंघका नेता हुर्कका अध्यक्ष पार्थो सरकारले गिरहतले हरवाचरवा राख्न छोडेपछि दैनिक मजदुरी गरी जिविकोपार्जन गर्दै आएका उनीहरुलाई साबुन पानीले हात धुन जनचेतनाकासाथ सामाजिक दुरी कायम गरी राहत वितरण गरेको बताए ।

राहत वितरण सो वार्डका अध्यक्ष राजेन्द्रप्रसाद साह, नेपाल पत्रकार महसंघ शाखा सप्तरीका पूर्व अध्यक्ष धीरेन्द्रप्रसाद साह, हुर्कका उपाध्यक्ष तथा नेपाली काँग्रेसका नेता सुभाषचन्द्र सिंह, प्रधानाध्यापक गंगा यादव, ब्रह्मानन्द रजक, हरवाचरवा अधिकार मञ्चका सचिव रितादेवी रजक, कार्यक्रम संयोजक रिया राय, विद्यालय व्यवस्थापन समितिका अध्यक्ष ओकिल मण्डल, सहजकर्ता रंजना चौधरी, नेविसंघका सदस्य जितेन्द्र सुतिहार, महेश यादव, लगायतले गरेका थिए ।