मदन भण्डारी स्वास्थ्य विज्ञान प्रतिष्ठानमा चार पदाधिकारी नियुक्त

१६ भदौ, काठमाडौं । बागमती प्रदेश सरकारले भर्खरै स्थापना गरेको मदन भण्डारी स्वास्थ्य विज्ञान प्रतिष्ठानमा चार पदाधिकारी नियुक्त गरिएको छ । प्रतिष्ठानका उपकुलपति प्रा डा विश्वराज जोशीका सिफारिसमा सामाजिक विकासमन्त्री तथा सहकुलपति युवराज दुलालले प्रतिष्ठानका शिक्षाध्यक्षमा डा सतीश देव, रजिष्ट्रारमा राजेश प्रसाईं, निर्देशकमा डा हरिबहादुर खड्का र संयोजकमा चिरञ्जीवी चुडाललाई नियुक्त गरेका हुन् । नवनियुक्त पदाधिकारीलाई आजै पद तथा गोपनीयताको शपथ गराइएको छ ।

मुख्यमन्त्री पौडेलले प्रदेश सरकारको गौरव प्रतिष्ठानको विकासमा सबैको भूमिका महत्वपूर्ण हुने बताए । सामाजिक विकासमन्त्री दुलालले प्रतिष्ठानले प्रदेशको स्वास्थ्य क्षेत्रको सुधार गर्नाका साथै यस क्षेत्रका लागि दक्ष जनशक्ति उत्पादन गर्ने विश्वास व्यक्त गरे ।

नवनियुक्त उपकुलपतिकाे सपथ आज

नवनियुक्त उपकुलपति प्रा.डा. जोशीलाई प्रतिष्ठानका कुलपति तथा मुख्यमन्त्री डोरमणी पौडेलले पद तथा गोपनियताको सपथ गराएका थिए । सपथ ग्रहण कार्यक्रममा बाेल्दै कुलपति तथा मुख्यमन्त्री पौडेलले प्रतिष्ठानलाई राजनैतिक कार्यकर्ता भर्ती केन्द्र बन्न नदिने प्रतिबद्धता जनाए । उनले प्रतिष्ठानलाई १३ जिल्लाका जिल्ला स्तरीय अस्पताललाई र निजी अस्पताललाई पनि प्रतिष्ठान मातहत ल्याउने बताएका थिए । बागमती प्रदेश सरकारका सामाजिक मन्त्री युवराज दुलालको अध्यक्षतामा भएको सपथ ग्रहण कार्यक्रममा मन्त्री दुलालले प्रतिष्ठानलाई अनुसन्धान केन्द्रका रुपमा विकास गरिने धारणा व्यक्त गरेका थिए । कार्यक्रममा आउँदो ३ महिनाभित्र आगामी ठोस कार्य योजना सार्वजनिक गर्ने बताइएको छ । उपकुलपतिको कार्यकाल ४ बर्षको हुने छ । प्रदेश सरकारले २०७६ आश्विन २ गतेको राजपत्रमा प्रतिष्ठान ऐन प्रकाशित गरेको थियो ।