निषेधाज्ञा अवज्ञा गर्ने व्यवसायीको चेतावनी

१७ भदौ, बुटवल । कोरोना महामारी नियन्त्रणका लागि भन्दै निषेधाज्ञा गरेर व्यापार ठप्प पारेपछि व्यवसायी सरकारप्रति आक्रोशित भएका छन् । उद्योग व्यापार संगठन रुपन्देहीले अ विज्ञप्ति निकालेर अब हुने लकडाउन र निषेधाज्ञा अवज्ञा गर्ने चेतावनी दिएको छ ।

लकडाउन र निषेधाज्ञा लम्ब्याइरहँदा व्यवसाय पूर्णरुपमा बन्द गर्नुपर्ने अवस्थामा पुगेको तर सरकारले उद्योगी–व्यवसायीलाई कुनै पनि करमा छुट नदिएकाले अब गरिने लकडाउन वा निषेधाज्ञा अवज्ञा गरिने संगठनका अध्यक्ष नारायणप्रसाद भण्डारीले बताएका छन् ।

यसअघि जिल्लास्तरीय कोरोना संकट व्यवस्थापन केन्द्रको बैठकमा लकडाउन भदौ २० गतेसम्म लम्ब्याउने सिफारिस गर्ने विषयमा प्रशासनले ‘अन्तिम पटक’का लागि भनेर अनुरोध गरेकाले निजी क्षेत्रका प्रतिनिधिले सहमति जनाएको हुँदा अब गरिने लकडाउन स्वीकार्य नभएको अध्यक्ष भण्डारीको भनाई छ ।

‘भदौ २१ गतेदेखि नेपाल सरकार, स्वास्थ्य मन्त्रालयको निर्देशिका पालना गरी उद्योग, व्यवसाय सञ्चालन गर्न दिनुपर्ने विषयमा नगरपालिका र जिल्ला प्रशासनसँग सहमतिको प्रयास गर्छौं र नमानेको खण्डमा उद्योग–व्यवसाय सञ्चालन गर्न सूचना जारी गर्छौं ’ संगठनले जारी गरेको विज्ञप्तीमा उल्लेख छ ।

संगठनमा भैरहवामा २५ सय र जिल्लाभर ५ हजार उद्योगी–व्यवसायी आवद्ध छन् । सरकारले प्रभावकारी काम गर्न छाडेर लकडाउन र निषेधाज्ञा मात्रै जारी गर्दा व्यापार व्यवसाय भने चौपट भएको छ ।