अब बिहान ११ बजेसम्म पसल खुल्ने, इ-कमर्श सेवा पनि सुचारु

१७ भदौ, काठमाडौं । सरकारले कोरोना महामारी नियन्त्रण गर्न निषेधाज्ञा जारी गरेर जनतालाई सास्ती दिएको भन्दै आलोचना बढेपछि काठमाडौं उपत्यकाको निषेधाज्ञा केही खुकुलो भएको छ । काठमाडौं, भक्तपुर र ललितपुरका तीन वटै प्रमुख जिल्ला अधिकारीको बैठकले निषेधाज्ञा थप एक हप्ता थपेसँग खुकुलो गर्ने निर्णय गरेका हुन् ।

आज रातीसम्म जारी निषेधाज्ञा भदौ २४ गते राति १२ बजेसम्म लागू हुने छ । र यसबीचमा अत्यावश्यक भनिएका केही सेवाबाहेक अरु क्षेत्रलाई पनि खुकुलो गरिएको छ ।

अहिले बिहान ९ बजेसमम्म मात्रै खुलेका पसल अब विहान ११ बजेसम्म खुल्नेछन् । त्यसबेला खाद्यवस्तु, दूध र दूधजन्य पदार्थ, फलफूल, तरकारी, माछा मासु, बिक्री गर्ने पसल खोलेर बिक्री वितरण गर्न पाइनेछ । त्यस्तै विकास निर्माणसँग सम्बन्धित पसल दिउँसो २ देखि राति ९ बजेसम्म खुल्ने भएको छ । छोटो दूरीको ढुवानीका लागि प्रयोग हुने सवारी साधन पनि दिउँसो २ देखि ९ बजेसम्म चल्न पाउनेछन् ।

निषेधाज्ञाको समयमा यसअघि प्रतिबन्ध लगाइएको टेक अवे र उपभोग्य वस्तुको होम डेलिभरी सेवा भने खुला गरिएको छ । होम डेलिभरी सेवाको मापदण्ड भने जिल्ला प्रशासन कार्यालयले छिट्टै जारी गर्नेछन् । होम डेलिभरी र टेक अवे सेवा दिने व्यक्तिको पीसीआर परीक्षणको रिपोर्ट नेगेटिभ हुनुपर्नेछ र उनीहरुले भेटेका व्यक्तिहरुको अभिलेख राख्नुपर्नेछ ।

निषेधाज्ञामा राष्ट्रिय प्राथमिकता प्राप्त आयोजनाको निर्माणको काम पनि सञ्चालन गर्न पाइनेछ । तर यस्ता आयोजनाले कामदार र कर्मचारीलाई आयोजनास्थलमै क्वारेन्टिनमा राख्नुपर्नेछ ।

अब अत्यावश्यक कामका लागि काठमाडौं उपत्यका प्रवेशका लागि पीसीआर रिपोर्टमा कोरोना संक्रमण नभएको पुष्टि पनि अनिवार्य गरिएको छ ।