कोरोना कहरमै शुरु भयो रथयात्रा

१८ भदौ, काठमाडौं । ललितपुरको पुल्चोकमा रहेको रातो मत्स्येन्द्रनाथको रथयात्रा शुरु भएको छ । बिहीबार ललितपुरका स्थानीय युवाहरुले रथ तान्न शुरु गरेका हुन् । असोज २ गतेदेखि मलमास सुरु हुने र रथयात्रा अनिश्चित हुने भन्दै कोरोनालाई बेवास्ता गर्दै युवाहरुले रथ तान्न शुरु गरेका हुन् ।

यद्यपी युवाहरुले कोरोना मापदण्डको ख्याल गरेर रथ तान्न शुरु गरिएको बताएका छन् । रथ तान्न शुरु गरेपछि युवाहरुको भीड लागेको छ । पुल्चोक क्षेत्रमा ठूलै भीड समेत देखिन्छ । यसअघि विहान रथ तान्न पाउनुपर्ने माग गर्दै युवाहरुले प्रदर्शन समेत गरेका थिए ।

प्रदर्शनकै क्रममा प्रहरीले अवरोध गरेपछि युवाहरुले विरोधकै झोकमा रथ तान्न शुरु गरेका हुन् । तर यसबारेमा गुठी संस्थानले भने आधिकारिक निर्णय गरेको छैन् । गएको असार १० गतेदेखि निर्माण सुरु भएको रथमा मत्स्येन्द्रनाथको मूर्ति रथारोहण गरिसकिएको छ । तर कोरोनाको कारण अहिलेसम्म रथयात्रा हुन सकेको थिएन् ।

यस विषयमा छलफल गर्न गुठी संस्थान ललितपुरको बैठक बस्दैछ ।