कोरोनाबाट इजरायलमा मृत्यु हुनेको संख्या एक हजार बढी

२१ भदौ, काठमाडाैं । इजरायलमा नयाँ कोरोना भाइरसबाट मृत्यु हुनेको संख्या एक हजार नाघेको छ । संक्रमण फैलिनबाट रोक्न सरकारले कडा नयाँ नियमहरु पनि घोषणा गर्न थालेको छ । इजरायलले कोरोना नियन्त्रणका लागि शुरुमा अपनाएका विधिप्रति धेरैले सकारात्मक रुपमा लिएका थिए । तर मे महिनामा नियमहरुलाई खुकुलो बनाएसँगै नयाँ संक्रमितको संख्या ह्वात्तै बढेको थियो ।

प्रधानमन्त्री बेन्जामिन नेतन्याहूको विरोधमा भइरहेको साप्ताहिक प्रदर्शनका कारणले पनि संक्रमण फैल्याउन मद्दत गरेको छ । पछिल्ला दिनहरुमा दैनिक तीन हजारभन्दा बढी व्यक्तिमा संक्रमण देखिन थालेको छ । सरकारले संक्रमण रोक्न राष्ट्रव्यापी लकडाउन गर्ने सोचाई पनि अघि सारेको छ ।

समग्रमा इजरायलमा एक लाख ३० हजार संक्रमित भएका छन् जसमा २६ हजारभन्दा बढी व्यक्ति संक्रमणकै स्थितिमा रहेका छन् । प्रधानमन्त्री नेतन्याहूले नियुक्त गरेका कोरोना भाइरस परियोजना व्यवस्थापक डा रोन्नी गाम्जुको परामर्शमा सेनाले कोरोना संक्रमण रोक्न गत महिना एउटा कार्यदल गठन गरेको छ ।

यसले मुख्य कार्य नै संक्रमित व्यक्तिको सम्पर्क पहिचान गर्ने र संक्रमणको शृंखला रोक्ने रहेको छ । इजरायली अधिकारीहरुमाथि व्यवसाय र विद्यालयहरु चाँडै खोलिएको भन्दै जनस्तरबाट आक्रोश व्यक्त भइरहेको छ । एजेन्सी