प्रचण्डका घरबेटीसँगको ठेक्का सम्झौता रद्द, ५ करोड धरौटी जफत !

२१ भदौ, काठमाडौं । रसायनिक मल आपूर्ति गर्न नसकेपछि कृषि मन्त्रालयको कृषि सामग्री कम्पनी लिमिटेडले प्रचण्डका घरबेटी शारदाप्रसाद अधिकारीको शैलुङ कन्स्ट्रक्सनसँगको ठेक्का सम्झौता रद्द गरेको छ ।

कृषिमन्त्री घनश्याम भुसालले अधिकारीको शैलुङ इन्टरप्राइजेज र हुमनाथ कोइरालाको हानोको मल्टिप्रपोज कम्पनीसँग भएको ठेक्का सम्झौता रद्द गर्दै धरौटी जफत गरिएको बताएका छन् । यो निर्णयसँगै दुवै कम्पनीले राखेको पाँच पाँच करोड कार्यसम्पादन धरौटी रकम जफत हुने छ । साथै, थप कानुनी कारबाही एवं कालोसूचीमै राख्नका लागि कृषि सामग्री कम्पनी लिमिटेडले तयारी गरेको छ ।

५० हजार मेट्रिक टन युरिया मल ल्याउनका लागि पुस २८ र ४ माघमा गरिएको टेण्डरमा दुई कम्पनीले ठेक्का पाएका थिए । दुवै कम्पनीले गरेको ठेक्का सम्झौताअनुसार साउन १० गतेसम्म पहिलो लट तथा भदौ २० भित्र सबै मल ल्याइसक्नुपर्ने थियो । तर उनीहरुले मल नल्याएपछि सरकारले बंगलादेशबाट पैचोमा मल ल्याउने तयारी गरेको छ ।