नेकपाको स्थायी कमिटी बैठक भदौ २६ गते बोलाउने सहमति

२२ भदौ, काठमाडौं । एक महिनादेखि स्थगित सत्तारुढ नेकपाको स्थायी कमिटी बैठक भदौ २६ गते बस्ने भएको छ । नेकपाका अध्यक्षद्धय प्रधानमन्त्री केपी शर्मा ओली र पुष्पकमल दाहाल प्रचण्डबीच पछिल्लो पटक साउन १३ गतेदेखि स्थगित स्थायी कमिटी बैठक भदौ २६ गते बिहीबार बोलाउने सहमति भएको हो ।

आइतबार बिहान अध्यक्ष ओली, प्रचण्डसँगै महासचिव विष्णु पौडेलबीच भएको छलफलले भदौ २६ गते स्थायी कमिटी बैठक बोलाउने सहमति जुटाएको हो । आन्तरिक विवाद बढ्दै गएपछि नेकपाको स्थायी कमिटी बैठक स्थगित हुदै आएको थियो ।

पछिल्लो पटक साउन १३ गतेको बैठकमा प्रधानमन्त्री ओली अनुपस्थित थिए । त्यसअघि बसेका बैठकमा अधिकांश सदस्यले अध्यक्ष र प्रधानमन्त्री पदबाट ओलीको राजीनामा माग गरेपछि स्थायी कमिटी प्रभावित भएर स्थगित हुदै आएको थियो । तर अहिले सो विवाद मिलेपछि ओली र प्रचण्ड बैठक बोलाउन सहमत भएका हुन् ।