मल नपाएका किसानलाई क्षतिपूर्ति दिन नेविसंघको माग

२२ भदौ, काठमाडौं । नेपाल विद्यार्थी संघ नेविसंघले समयमै मल नपाएका किसानलाई क्षतिपूर्ति दिन सरकारसँग माग गरेको छ । सरकारले असारमै मल ल्याउछु भनेर ठेक्का सम्झौता गरेपनि भदौसम्म समेत मल उपलब्ध नगराएका कारण यसबीचमा ठुलो नोक्सानी व्यवहोरिरहेका किसानलाई क्षतिपूर्ति दिन नेविसंघले माग गरेको हो ।

नेविसंघका महामन्त्री बलदेव तिमिल्सिनाले एक विज्ञप्ती जारी गर्दै मल नल्याउने कम्पनीलाई कालोसूचीमा राख्नु मात्रै उपयुक्त नभएको भन्दै किसानलाई क्षतिपूर्ति दिनुपर्ने माग गरे ।

‘सरकारले ठेक्का सम्झौता गरेर मल नल्याउने ठेकेदारसँगको ठेक्का खारेज गरेको भन्ने सुन्नमा आएको छ’ नेविसंघ महामन्त्री तिमिल्सिनाले प्रश्न गर्दै भनेका छन, ‘पटक पटक बिबादमा आएको र पहिल्यै कालोसूचीमा परेको कम्पनीलाई मिलेमतोमा ठेक्का दिनेलाई चाहीं कार्वाही किन गरिदैंन ?’

‘यस्ता ठग कम्पनीबाट तत्काल क्षतिपूर्ति असूल गर्न र जनतामारा सरकारको गलत निर्णयबाट मर्कामा रहेका किसानलाई आवश्यक क्षतिपूर्तिको व्यवस्था गर्न माग गर्दछु’ विज्ञप्तीमा भनिएको छ ।

सरकारले सम्झौता गरेर पनि मल नल्याउने नेकपाका अध्यक्ष प्रचण्डका घरबेटी शारदाप्रसाद अधिकारीको शैलुङ कन्सट्रक्सनसँगको ठेक्का रद्द गरेर धरौटी जफत गर्ने निर्णय गरेको थियो ।