सामुहिक बलात्कारकाे आरोपमा शिक्षकसहित तीन जना पक्राउ

२२ भदौ, बैतडी । बैतडीमा एक किशोरीमाथि सामुहिक बलात्कारकाे आरोपमा शिक्षकसहित तीन जनालाई प्रहरीले पक्राउ  गरेकाे छ । बलात्कृत किशोरीले बिवाह गरेको ६ महिनामै गर्भवती भएर छोरी जन्माएपछि शिक्षकसहित तीन जना युवाले १७ बर्षीया किशोरीमाथि सामुहिक बलात्कार गरेको रहस्य खुलेको प्रहरीले जनाएकाे हाे ।

सिगास गाउँपालिका ८ को जनचेतना आधारभूत विद्यालयका शिक्षक खड्गा बोहरा, केशब बोहरा र स्थानीय रामबहादुर बोहराले किशोरीमाथि बलात्कार गरेका हुन् । बलात्कार गरेपछि उनीहरुले किशोरीलाई बिहे गरेर गाउँ छाड्न दबाब दिएका थिए ।

किशोरीले बिहे गरेपश्चात ६ महिनामै बच्चा जन्माएपछि घरपरिवारले सोधखोज गरेका थिए । किशोरीलाई वास्तविकता खोल्न दबाब दिएपछि आफू तीन जनाबाट पटक पटक बलात्कृत भएको बताएकी थिइन् । शिक्षक बोहरा भने अहिले गाउँपालिकामा कार्यरत रहेको स्थानीयको भनाई छ । प्रहरीले घटनाबारे थप अनुसन्धान भइरहेको बताएको छ ।