सेनाको पृतना तालीम शिक्षालयका ६३ जनालाई कोरोना

२२ भदौ, सुदूरपश्चिम । कैलाली लम्कीचुहा नगरपालिकाको गोरङ्गेस्थित नेपाली सेनाको पृतना तालीम शिक्षालयका ६३ जनामा आज कोरोना भाइरस संक्रमणको पुष्टि भएको छ । नगरपालिकाका स्वास्थ्य शाखा प्रमुख जयन्ती विसिले उक्त तालीम केन्द्रका २४५ सैनिकको नमूना सङ्कलन गरिएकोमा साेमबार ६३ मा कोरोना रिर्पोट पोजेटिभ आएको हो ।

गोरङ्गे नेपाली सेनाका अनुसार शिक्षालयलका १२९ जनाको काेराेना नतिजा आजै बिहान नेगेटिभ आएको जनाइएको छ । ५३ जनाको आउन बाँकी रहेकाे गोरङ्गे नेपाली सेनाले नेपालबहस डटकमलार्ई जानकारी दिएकाे छ ।

उता सेती प्रादेशिक अस्पताल धनगढीको प्रयोगशालामा गरिएको ४४५ नमूनाको परीक्षणमा ७६ जनामा सङ्क्रमित पुष्टि भएको अस्पतालका सूचना अधिकारी दिलीपकुमार श्रेष्ठले बताए ।

कोभिड–१९ बाट प्रदेशमा सबैभन्दा बढी प्रभावित कैलालीमा कुल सङ्क्रमित र सक्रिय सङ्क्रमित बिरामी बढ्दै गएका छन् । आजसम्म कैलालीमा छ, बझाङ र बाजुरामा दुई÷दुई तथा अछाममा एक गरी प्रदेशमा ११ जनाको मृत्यु भएको छ ।