बागलुङमा कोरोना संक्रमितको संख्या तीन सय पुग्यो

२२ भदौ, बागलुङ । जिल्लामा कोरोना संक्रमितको सङ्ख्या तीन सय छ पुगेको छ । स्वास्थ्य कार्यालयका अनुसार हालसम्म निको हुनेको सङ्ख्या २७९ छ भने एक जनाको मृत्यु भएको छ ।

आइसोलेशनमा रहेका संक्रमितको सङ्ख्या २६ छ भने क्वारेन्टिनमा ७२ जना छन् । पछिल्लो पटक आइतबार काठेखोला गाउँपालिकाका तीन जनामा कोरोना संक्रमण पुष्टि भएको थियो । जिल्लामा पहिलो पटक गत चैत १५ गते कोरोना देखिएको थियो जुन नेपालकै पाँचौँ संक्रमणको घटना थियो । त्यसयता भारतबाट आएका अधिकांश व्यक्तिमा कोरोना देखिए पनि पछिल्लो समय समुदायमा संक्रमित भेटिन थालेका छन् ।

जिल्लामा अहिलेसम्म झण्डै सात हजारको पीसीआर परीक्षण गरिएको कार्यालयले जनाएको छ । सबैभन्दा बढी बागलुङ नगरपालिकामा ५४ र सबैभन्दा कम तमानखोला गाउँपालिकामा सात जनामा संक्रमण देखिएको छ ।