उपत्यकामा निषेधाज्ञा खुकुलो बनाएर सेना परिचालन गर्न मेयरहरुको सुझाव

२३ भदौ, काठमाडौं । जनजीवन कष्टकर बनेपछि काठमाडौं उपत्यकाका मेयरहरुले निषेधाज्ञा खुकुलो बनाएर नाकामा सेना परिचालन गर्न सरकारलाई सुझाव दिएका छन् । काठमाडौं उपत्यका नगरपालिका फोरमले उपत्यकाभित्र निषेधाज्ञा खुकुलो बनाउनुपर्ने आवश्यकता रहेको भन्दै सीमा नाकालाई खुकुलो छाड्न नहुने बताएका हुन् ।

ललितपुर महानगरपालिकाका मेयर चिरिवावु महर्जनको अध्यक्षतामा मंगलबार बसेको बैठकले उपत्यकाको निषेधाज्ञा खुकुलो पार्ने निर्णय गरेको हो । तर यसका लागि नाकामा कडाई गर्नुपर्ने मेयरहरुको सुझाव छ ।

नगरपालिका फोरमले नागरिकलाई जनस्वास्थ्यका मापदण्डबारे सचेत र जिम्मेवार बनाउँदै जाने, उद्योग, व्यवसाय र कलकारखाना सञ्चालन गर्दा स्वास्थ्य सुरक्षा मापदण्ड पालना गराउने, सवारी साधन जोर बिजोर गराउने, सार्वजनिक सवारी हाललाई सञ्चालनमा नल्याउने लगायत निर्णय पनि गरेको छ ।

मेयरले दिएका सुझावअनुसार गृह मन्त्रालय अन्तर्गतको जिल्ला प्रशासन कार्यालयले भोलि निषेधाज्ञा खोल्ने वा थप गर्ने भन्ने बारे निर्णय गर्ने छ।