नेकपाले झुटको राजनीति गरिरहेको छ : नेता केसी

२४ भदौ, काठमाडौं । पूर्वमन्त्री तथा नेपाली कांग्रेसका प्रभावशाली नेता अर्जुननरसिंह केसीले सत्तारुढ नेकपाले सत्य लुकाएर, जनताको आवाज थुनेर झुटको राजनीति गरिरहेको आरोप लगाएका छन् । बीपीको १०७ औँ जन्मजयन्तीको अवसरमा सामाजिक सञ्जाल ट्वीटरमा शुभकामना दिदै केसीले सत्तारुढ नेकपा जनताकाे सहयोगी नभई घात र धोकाको राजनीति गरिरहेको आरोप लगाएका हुन् ।

‘बीपीले भनेका छन्, जहाँ सत्यको मुख थुनिन्छ, त्यहाँ मिथ्याको थुतुनो खुल्छ’ आफ्नो ट्वीटमा केसीले भने । साथै वर्तमान राजनीतिक दलका नेता तथा पार्टीहरु सत्य लुकाएर आफ्नो स्वार्थका लागि राजनीति गर्नाले जनताले राहत र सुख पाउन नसकेको पनि केसीको भनाई छ । बीपीको जन्मजयन्तीको दिनमा सबैले जनताको आधारभूत आवश्यकतालाई केन्द्रमा राखेर राजनीति गर्ने प्रण गर्नुपर्नेमा उनले जोड दिएका छन् ।

नेपाली कांग्रेसका शीर्षस्थ नेता, प्रजातन्त्र र समाजवादका प्रणेता, पूर्वप्रधानमन्त्री जननेता बीपी कोइरालाको जन्मदिवसको अवसरमा केसीले श्रद्धाञ्जली व्यक्त गरेका छन् ।