देशभर चार हजार सुरक्षाकर्मी संक्रमित

२४ भदौ, काठमाडौं । कोरोना महामारीबाट जनतालाई जोगाउने सुरक्षाकर्मी नै संक्रमित हुन थालेका छन् । पछिल्लो समय दिनप्रतिदिन सुरक्षाकर्मी संक्रमित हुन थालेपछि चिन्ता बढेको हो । नेपाल प्रहरीका २ हजार ३१७ जना जवान तथा उच्च अधिकारी कोरोना संक्रमित हुन पुगेका छन् ।

संक्रमित हुनेमा उपत्यकाकै ८ सय जना प्रहरी छन् । यस्तै नेपाली सेनाका ७ सय ४३ जना र सशस्त्रका ८ सय ८६ जनालाई कोरोना संक्रमण पुष्टि भएको छ । अहिले अरुभन्दा सुरक्षाकर्मीमार्फत उनीहरुकै निकायका सुरक्षाकर्मीमा छिटो कोरोना फैलिरहेको छ । एक व्यक्तिमा देखिनेवित्तिकै अर्को व्यक्तिमा पनि कोरोना संक्रमण हुने भएकाले जोखिम निकै बढ्दो छ । पछिल्लो समय पुल्चोकको रथयात्राका क्रममा झडप नियन्त्रण गर्न खटिएका १८ जना प्रहरीलाई कोरोना देखिएको थियो । उनीहरुबाट अरु मानिस तथा सुरक्षाकर्मीमै पनि कोरोना संक्रमण बढ्दो छ ।