तरुण दलले वीर र पाटन अस्पताललाई दियो स्वास्थ्य सामग्री

२४ भदौ, काठमाडौं । नेपाली कांग्रेसको भातृ संगठन तरुण दलले पाटन र वीर अस्पताललाई स्वास्थ्य सामग्री हस्तान्तरण गरेको छ । कोरोना महामारीका बेला जीउज्यान जोखिममा राखेर काम गरिरहेका स्वास्थ्यकर्मीहरूकाे सुरक्षाका लागि पीपीई, फेशसिल्ड लगायतका स्वास्थ्य सामग्री हस्तान्तरण गरिएको हो ।

नेपाल तरुण दल केन्द्रिय समितिले १०७ औं बीपी जयन्तीका अवसरमा पाटन अस्पताल लगनखेलको हाडजोर्नी विभागमा १००० थान मास्क, २० थान पीपीई सेट, र २० थान फेसशिल्ड हस्तान्तरण गरेको हो ।

यस्तै वीर अस्पताल अन्तर्गत नाक, कान, घाटी विभागमै पुगेर १००० थान मास्क, २० थान पीपीई सेट, र २० थान फेस शिल्ड हस्तान्तरण गरेको तरुण दलले जनाएको छ । अस्पताललाई वितरण गरिएको स्वास्थ्य सामग्री काठमाडौँ क्षेत्र नं ३ का महासमिति सदस्य हरिबोल भण्डारी र मेन्ज फाउन्डेसनका अध्यक्ष मेन्ज खानले उपलब्ध गराएका हुन् ।

स्वास्थ्य सामग्री उपलब्ध गराएकोमा भण्डारी र खानलाई तरुण दल केन्द्रिय समितिले आभार व्यक्त गरेको छ ।